1. ‘Ua tepa a‘e Iakopo ‘ua iloa atu, fa‘auta fo‘i, o Esau ‘ua sau ma tagata e to‘afa selau ma ia. ‘Ona vavae atu lea e ia o le fānau ‘iā Lea ma Rasela ma ‘au‘auna fafine e to‘alua.
2. ‘Ona tu‘umua atu lea e ia o ‘au‘auna fafine ma a lā‘ua fānau, ma Lea ma ana fānau e aupito ane i ai ma Rasela ma Iosefa e aupito mulimuli i lā‘ua.
3. ‘Ona muamua atu lea o ia ‘iā te i latou, ‘ua fa‘afitu ‘ona ifo to‘ele, ‘ua o‘o ‘ina latalata atu i lona uso.
4. ‘Ona momo‘e mai lea o Esau e fa‘afetaia‘i mai ‘iā te ia, ‘ua fusi ‘iā te ia ma punou i lona ua, ma feasogi ma ia; ‘ona la fētāgisi ai lea.
5. ‘Ona tepa a‘e lea o Esau, ‘ua iloa atu fafine ma le fānau; ‘ona fa‘apea mai lea o ia, “O ai ‘ea i latou na ‘ua ‘iā te oe?”‘Ona tali atu lea o ia, “O a‘u fānau ‘ua foa‘iina mai e le Atua i lona alofa i lau ‘au‘auna.”
6. ‘Ona fa‘alatalata mai lea o ‘au‘auna fafine, o i lā‘ua ma a la fānau, ‘ona ifo lea o i latou.
7. ‘Ua fa‘alatalata mai fo‘i Lea ma ana fānau, ‘ua ifo fo‘i i latou; mulimuli ane ‘ona fa‘alatalata mai lea o Iosefa ma Rasela, ‘ua ifo fo‘i i lā‘ua.
8. ‘Ona fa‘apea mai lea o ia, “E fa‘apefea lenā vao manu ‘ua matou fetaia‘i?”‘Ona tali atu lea o ia, “O au manu, ‘ia alofaina ai a‘u e lo‘u ali‘i.”
9. ‘Ona fa‘apea mai lea o Esau, “Lo‘u uso e, e tele a‘u nei mea; tu‘u pea ia au mea ‘iā te oe.”
10. ‘Ona tali atu lea o Iakopo, “‘Aua lava, ‘āfai ‘e te alofa mai ‘iā te a‘u, ‘ia e talia mai lava la‘u mea alofa; auā o lenei, ‘ua ‘ou iloa atu ou fofoga, e peiseaī ‘ua ‘ou iloa atu fofoga o le Atua ma ‘ua e finagalo malie mai ‘iā te a‘u.