28. ‘Ua fa‘apea mai fo‘i o ia, “‘Ia e ta‘utino mai ‘iā te a‘u sou totogi; ‘ou te avatua lava ‘iā te oe.”
29. ‘Ona fai atu ai lea o ia ‘iā te ia:“‘Ua e iloa le uiga o la‘u ‘au‘auna atu ‘iā te oe, ma au mea ‘ua ‘iā te a‘u.
30. Auā sa itiiti mea ‘iā te oe a ‘ou te le‘i sau, a ‘ua tupu, ‘ua matuā tele, ‘ua fa‘amanuia oe e le ALI‘I ‘ona o a‘u; a o lenei, o afea ‘ea ‘ou te sauni ai mea ma lo‘u lava ‘āiga?”
31. ‘Ona fai mai ai lea o ia, “Se a le mea ‘ou te avatu ‘iā te oe?”‘Ona fai atu ai lea o Iakopo:“‘Aua, ‘e te ‘aumai se mea ‘iā te a‘u; ‘āfai ‘e te fai le mea nei ma a‘u, ‘ou te toe fafaga lou lafu ma leoleo ai.
32. ‘Ou te fealualua‘i i lou lafu uma i le aso nei, e tu‘u ‘ese ai o mamoe uma e ilaila solo ma pulepule; o mamoe efuefu uma i le lafu, ma ‘oti pulepule uma, ma e ilaila solo, e fai ia mo‘u totogi.
33. O le mea lea e iloa ai la‘u amiotonu i se aso, pe a o‘o mai lo‘u totogi i ou luma; o ‘oti uma e lē ilaila solo pe pulepule, ma mamoe uma e lē efuefu, e ta‘ugaoia a‘u i lea mea.”
34. ‘Ona fai mai ai lea o Lapana, “‘Ou te mana‘o ‘ina ‘ia faia le mea ‘ua e fai mai ai.”
35. O lea aso fo‘i na ia tu‘u ‘ese ai o ‘oti po‘a sa tusitusi ma pulepule, ma ‘oti fafine uma sa ilaila solo ma pulepule, ‘atoa ma ‘oti uma lava ‘ua i ai se ila sinasina, ma mamoe uma ‘ua efuefu, ‘ona tu‘u atu ai lea i ona atali‘i.
36. ‘Ua ia tu‘u fo‘i le vā i ala e po tolu le sāvaliga i lo la vā ma Iakopo; ‘ae leoleoina e Iakopo le toe lafu o Lapana.
37. ‘Ona ‘ave ai lea e Iakapo o tātupu o le lipene mata, ma le lusa, ma le aremoni, na ia fofo‘e ai le pa‘u ‘ia pulepule sisina la‘au.
38. ‘Ua ia fa‘atutūina la‘au na na fofo‘e i mea fa‘aliu, o mea ia e inu ai vai, i luma o le lafu, ‘ina ‘ua ō atu le lafu e feinu ai, ‘ina ‘ia ofi ai le lafu pe a ō atu e inu.
39. ‘Ona ofi ai lea o le lafu i luma o la‘au, ‘ua fānanau ai o manu tusitusi, ma ilaila solo, ‘atoa ma ē pulepule.
40. ‘Ua tu‘u ‘ese e Iakopo tama‘i mamoe, ‘ua na fa‘asaga atu fo‘i mata o le lafu i manu tusitusi, ma manu efuefu uma i le lafu o Lapana; ‘ona tu‘u ‘ese ai lea e ia lona lava lafu, ‘ae le‘i tu‘u fa‘atasi ma le lafu o Lapana.
41. ‘Ua o‘o ‘ina a ofi manu malolosi ‘ona tu‘u ai lea e Iakopo o la‘au i mea e inu ai i luma o manu, ‘ina ‘ia ofi ai i luma o la‘au.
42. ‘Ae peita‘i o manu ‘ua vaivai, ‘ua ia le tu‘u ai la‘au, ‘ona fai ai lea o manu vaivai ma Lapana, a o ē malolosi ‘ua fai ia ma Iakopo.
43. ‘Ua matuā fa‘ateleina lava mea a lea tagata, na ‘iā te ia mamoe tele ma ‘au‘auna fafine ma ‘au‘auna tane ma kamela, ‘atoa ma asini.#