21. ‘Ua fa‘atoga atu Isaako i le ALI‘I mo lana avā, auā ‘ua pā o ia; ‘ua fa‘afofoga fo‘i le ALI‘I ‘iā te ia, ‘ona tō ai lea o lana avā o Repeka.
22. ‘Ua feu‘ua‘i fo‘i tama i totonu ‘iā te ia; ‘ona fa‘apea lea o ia, “‘Āfai e fa‘apea, se a le mea ‘ua ‘ou fa‘apea ai?” ‘Ua alu fo‘i o ia o fesili atu i le ALI‘I.
23. ‘Ua tali mai fo‘i le ALI‘I ‘iā te ia:“E lua nu‘u o lo‘o i totonu ‘iā te oe,E lua lava nu‘u e fānau mai ‘iā te oe;E sili ‘ona malosi o le tasi nu‘u i le isi nu‘u;E nofo pologa fo‘i le ulumatua i le ui‘i.”
24. ‘Ua o‘o i le aso e fānau ai o ia, fa‘auta, o le māsaga ‘ua i totonu ‘iā te ia.
25. O lē na mua‘i fānau mai ‘ua ‘ena‘ena mūmū ‘ua pei se ‘ofu fulufulu ‘ua liloia ai o ia; na latou fa‘aigoa ai ‘iā te ia o Esau.
26. Mulimuli ane ‘ua fānau mai ai lona uso, ‘ua ‘u‘u atu fo‘i lona lima i le mulivae o Esau; ‘ua fa‘aigoa fo‘i ‘iā te ia o Iakopo; o le onogafulu o tausaga o Isaako na fānau ai i lā‘ua.
27. ‘Ua tutupu nei tama; o Esau fo‘i o le tagata ia ‘ua poto i tuli manu, o le tagata a vao, a o Iakopo o le tagata agamalū o ia, ‘ua mau i fale ‘ie.
28. Na alofa Isaako ‘iā Esau, auā ‘ua ia ‘ai i ana manu; a o Repeka, na alofa o ia ‘iā Iakopo.
29. Na tunu fo‘i e Iakopo o mea e ‘ai ‘ua sau fo‘i Esau nai le vao, ‘ua lailoa fo‘i o ia;
30. ‘Ona fa‘apea atu lea o Esau ‘iā Iakopo, “Se‘i ‘aumai sina mea mūmū lenā e tunu se‘i ‘ou ‘ai ai, auā ‘ua ‘ou vaivai.” O le mea lea ‘ua fa‘aigoa ai o ia o Etoma.