Feagaiga Tuai

Feagaiga Fou

Kenese 23:3-15 O LE TUSI PA'IA - Ekalesia Katoliko Roma (RSCB)

3. ‘Ona tula‘i lea o Aperaamo ai luma o lana avā ‘ua oti, ma tautala atu i le fānauga a Heti, ‘ua fa‘apea atu,

4. “O a‘u o le tagata ‘ese ma le āumau ‘iā te ‘outou; ‘inā tu‘u mai ia mo a‘u se mea e fai ma tu‘ugamau i lo ‘outou nu‘u, ‘ina ‘ia ‘ou tanu ai la‘u avā ‘ua oti, ‘ia ‘ou lē toe va‘ai i ai.”

5. ‘Ona tali mai lea o le fānauga a Heti ‘iā Aperaamo, ‘ua fa‘apea mai ‘iā te ia,

6. “Le ali‘i e, fa‘afofoga mai ia ‘iā te i matou; o le ali‘i tele oe o ‘iā te i matou; ‘ia e tanu lou faletua ‘ua maliu i so matou tu‘ugamau e lelei; e leai so matou e vavao sona tu‘ugamau, ‘ae tu‘u atu ‘iā te oe e tanu ai lou faletua ‘ua maliu.”

7. ‘Ona tu lea i luga o Aperaamo ma ifo atu i tagata o lea nu‘u, o le fānauga a Heti.

8. ‘Ona fai atu lea o ia ‘iā te i latou, ‘ua fa‘apea atu, “‘Āfai o lo ‘outou finagalo ‘ou te tanumia la‘u avā ‘ua oti, ‘ia ‘ou lē toe va‘ai i ai, ‘ia ‘outou fa‘afofoga mai ‘iā te a‘u ma ‘ia ‘outou fautua ai ‘iā Eferona le atali‘i o Soaro mo a‘u,

9. ‘ina ‘ia tu‘uina mai e ia ‘iā te a‘u le ana o Makapelu, o lo‘o ‘iā te ia, i le tuā‘oi o lona fanua; na te tu‘uina mai ‘iā te a‘u i lo ‘outou nu‘u e fai ma tu‘ugamau, ‘ae ‘ou taui atu i tupe la te tatau.”

10. Sa nofo mai fo‘i Eferona fa‘atasi ma le fānauga a Heti; ‘ua fai mai fo‘i Eferona o lo sa Heti ‘iā Aperaamo i luma o le fānauga a Heti, o i latou uma o ē ulu mai i le faitoto‘a o lana ‘a‘ai, ‘ua fa‘apea mai,

11. “Le ali‘i e, sōia; se‘i ē fa‘afofoga mai ‘iā te a‘u; ‘ou te foa‘iina atu ‘iā te oe le fanua, ‘atoa ma le ana o i ai, ‘ou te foa‘iina atu ai ‘iā te oe, ‘ou te foa‘iina atu lava ‘iā te oe i luma o lo‘u nei nu‘u; ma e teu ai ‘ia lou faletua ‘ua maliu.”

12. ‘Ona ifo ai lea o Aperaamo i luma o tagata o le nu‘u.

13. ‘Ua ia fai atu fo‘i ‘iā Eferona i luma o tagata o le nu‘u, ‘ua fa‘apea atu, “‘Āfai o lea, ‘inā se‘i e fa‘afofoga mai ‘iā te a‘u; ‘ou te avatu lava tupe e tau a‘i le fanua; ‘inā e talia mai ia ‘ona ‘ou tanu ai lea o la‘u avā ‘ua oti.”

14. ‘Ona tali mai lea o Eferona ‘iā Aperaamo, ‘ua fa‘apea mai ‘iā te ia,

15. “Le ali‘i e, ‘ia e fa‘afofoga mai ‘iā te a‘u; e tusa le fanua ma sekeli ario e fa selau, O le a lea ‘iā te i tā‘ua? teu pea ia o lou faletua ‘ua maliu.”

Faitau le mataupu e atoatoa Kenese 23