7. ‘Ua maua fo‘i o ia e le agelu a le ALI‘I i le vaipuna i le vao, o le vaipuna i le ala i Sura.
8. ‘Ona fa‘apea atu lea o ia, “Akara e, le ‘au‘auna a Sarai, maifea oe? O fea ‘ea a e alu i ai?”‘Ona tali mai lea o ia, “‘Ua ‘ou sola mai ‘iā Sarai o lo‘u matai.”
9. ‘Ona fa‘apea atu lea o le agelu a le ALI‘I ‘iā te ia, “‘Ia e fo‘i atu i lou matai ma e fa‘amaulalo atu ‘iā te ia.”
10. ‘Ua fetalai atu fo‘i le agelu a le ALI‘I ‘iā te ia, “‘Ou te matuā fa‘ato‘ateleina lava lau fānau, e lē mafai lava ‘ona faitau ‘ina ‘ua to‘atele.”
11. ‘Ua fetalai atu fo‘i le agelu a le ALI‘I ‘iā te ia, “Fa‘auta, ‘ua e tō, o le a e fānau mai se tama tane, ‘e te fa‘aigoa fo‘i ‘iā te ia o Isamaeli; auā ‘ua fa‘afofogaina e le ALI‘I lou tigā.
12. E fai o ia ma tagata e tusa ma le asini o le vao; e fai tagata uma mōna fili, e fai fo‘i o ia ma fili o tagata uma; e mau fo‘i o ia i luma o ona uso uma.”
13. ‘Ona fa‘aigoaina lea e ia le suafa o le ALI‘I o lē na fetalai mai ‘iā te ia, “O oe le Atua lē ‘ua fa‘aali mai ‘iā te a‘u.” Auā ‘ua fa‘apea ane, “‘Ua ‘ou va‘ai atu ‘ea ‘i‘inei i tua o lē o lo‘o silasila mai ‘iā te a‘u?”
14. O le mea lea ‘ua fa‘aigoaina ai le vai‘eli, “O Perelaaroi,” fa‘auta, o lo‘o i le vā o Katesa ma Pareta.
15. ‘Ua fānau mai fo‘i Akara le atali‘i ‘iā Aperamo; ‘ua fa‘aigoaina fo‘i e Aperamo lona atali‘i na fānau mai ‘iā Akara, o Isamaeli.
16. O le valu sefulu ma le ono o tausaga o Aperamo na fānau mai ai Akara o Isamaeli le atali‘i o Aperamo.