1. ‘Ua ‘ava‘e ia mea, ‘ona tulei mai lea o le afioga a le ALI‘I ‘iā Aperamo i le fa‘aaliga ‘ua fa‘apea mai, “Aperamo e, ‘aua ‘e te fefe o a‘u nei o lou talitā, o lou taui e matuā tele lava.”
2. ‘Ona tali atu lea o Aperamo, “Le Ali‘i e, le ATUA, se a se mea ‘e te foa‘i mai ‘iā te a‘u, auā e leai sa‘u fānau, o lē e ona le tofi i lo‘u ‘āiga o Elisara lea le Tamaseko?”
3. ‘Ua fa‘apea fo‘i Aperamo, “Fa‘auta ‘ua e lē foa‘i mai ‘iā te a‘u sa‘u fānau; Fa‘auta fo‘i e fai mo‘u suli le tagata ‘ua fānau i lo‘u ‘āiga.”
4. Fa‘auta fo‘i, ‘ua tulei mai le afioga a le ALI‘I ‘iā te ia, ‘ua fa‘apea mai, “E lē fai lea tagata mou suli; a o lē e fānaua e oe lava e fai o ia mou suli.”
5. ‘Ua ia ‘aumaia fo‘i o ia i fafo, ma fa‘apea atu, “‘Inā e va‘ava‘ai a‘e ia i le lagi, ma ē faitauina fetū, pe ‘āfai e mafaia ‘ona e faitauina.” ‘Ua ia fa‘apea atu fo‘i ‘iā te ia, “E fa‘apea lava lau fānau.”
6. ‘Ua fa‘atuatua fo‘i o ia i le ALI‘I, ‘ona ia ta‘uamiotonuina mai ai lea ‘iā te ia.
7. ‘Ua ia fetalai mai fo‘i ‘iā te ia, “O a‘u o le ALI‘I, o lē na ‘aumaia oe mai Uro i Kaletaia, ‘ina ‘ia foa‘iina atu ai ‘iā te oe lenei lava nu‘u e fai mou tofi.”
8. ‘Ona tali atu lea o ia, “Le Ali‘i e, le ATUA, se a se mea ‘ou te iloa ai e fai mo‘u tofi lenei nu‘u?”