10. Sa i ai fo‘i i le vanu o Setima o lua o pulu emeri e tele lava; na sōsōla fo‘i le tupu o Sotoma ma le tupu o Komoro; ma pa‘u‘ū i le mea; a o ē na totoe na sōsōla i latou i le mauga.
11. ‘Ona latou vetea lea o ‘oloa uma o Sotoma ma Komoro, ‘atoa ma a latou mea e ‘ai uma, ‘ona ō ai lea o i latou.
12. ‘Ua latou ‘avea fo‘i Lota le atali‘i o le uso o Aperamo, ‘atoa ma ana ‘oloa, o ia fo‘i sa nofo i Sotoma, ‘ona ō ai lea o i latou.
13. ‘Ua alu atu fo‘i le tasi na sao ma ta‘u atu ‘iā Aperamo le Eperu, o lē sa mau i aluna o Mamere o sa Amorī, o le uso o Esekolo, o le uso fo‘i o Aneri, o i latou na osi feagaiga ma Aperamo.
14. ‘Ua fa‘alogo Aperamo ‘ua ‘avea lona uso i le tau‘a, ‘ona saunia lea e ia ona tagata ‘ua a‘oa‘oina, ē na fānanau i lona ‘āiga, e to‘atolu selau ma le to‘asefulu ma le to‘avalu, ma ‘ua tuliloa ‘iā te i latou e o‘o i Tanu.
15. ‘Ua ia tofia fo‘i o ‘au a ona tagata i le po e tau ma i latou, ‘ua fafasi fo‘i ‘iā te i latou, ma tuli muli‘au ‘iā te i latou ‘ua o‘o i Hopa, e i le itū tauagavale lea o Tamaseko.
16. ‘Ua toe maua mai fo‘i e ia o le ‘oloa uma lava; ‘ua ia toe maua mai fo‘i Lota lona uso, ma ana ‘oloa, o fafine fo‘i, ‘atoa ma le nu‘u.
17. ‘Ua alu atu fo‘i le tupu o Sotoma e fa‘afetaia‘i ‘iā te ia i le vanu o Savee, e ta‘ua fo‘i lea o le vanu o le tupu, ‘ina ‘ua toe fo‘i mai i le tau‘a ma Kitalaoma, ma tupu sa ‘au fa‘atasi ma ia.
18. A o Mekisateko o le tupu o Salema ‘ua avane e ia areto ma uaina; o le ositaulaga fo‘i o ia a le Atua silisili ‘ese.
19. ‘Ua ia fa‘amanuia fo‘i ‘iā te ia, ‘ua fa‘apea atu:“‘Ia manuia Aperamo i le Atua silisili ‘ese,e ona le lagi ma le lalolagi.
20. ‘Ia fa‘afetaia fo‘i le Atua silisili ‘ese,o lē na tu‘uina mai ou fili i ou lima.”‘Ua foa‘i atu fo‘i e Aperamo ‘iā te ia o mea e sefulua‘i o mea uma.