1. Sa tasi lava le gagana e tasi fo‘i le tautala a le lalolagi uma.
2. ‘Ua o‘o fo‘i ‘ina latou ō mai mai sasa‘e, ‘ona maua lea e i latou le fanua laugatasi i le nu‘u o Senara, ‘ona latou mau ai lea.
3. ‘Ona latou fetautalatala‘i lea o le tasi ma le tasi, “Sau ia, ‘inā tatou faia ia o ma‘a‘omea, ma matuā tunu ai i le afi.” ‘Ona fai lea o ma‘a‘omea mo latou ma‘a, ‘ua fai fo‘i le pulu emeri mo latou panisina.
4. ‘Ona latou fai ane lea, “Ō mai ia, ‘inā tatou fai ia o se ‘a‘ai, ma se ‘olo, ‘ia o‘o lona tumutumu i le lagi, ‘ia tatou faia fo‘i se mea e ta‘ua ai i tatou, ne‘i fa‘ata‘ape‘apeina i tatou i le fogā‘ele‘ele uma.”
5. ‘Ona afio ifo lea o le ALI‘I e silasila i le ‘a‘ai ma le ‘olo ‘ua faia e tagata.
6. ‘Ona fetalai ane lea o le ALI‘I, “Fa‘auta, ‘ua tasi le nu‘u e tasi fo‘i le gagana ‘iā te i latou uma; ‘ua amata fo‘i i latou ‘ona fai o lenei mea; o lenei fo‘i, e lē toe tāofia i latou i se mea e tasi. ‘Ua latou manatu i ai e fai.
7. Ō mai ia, ‘inā tatou ō ifo ia, ma ‘ia tatou fa‘a‘ese‘eseina i lea mea a latou gagana, ‘ina ‘ia lē lagona e le tasi le gagana a le tasi.”
8. ‘Ona fa‘ata‘ape‘ape lea e le ALI‘I ‘iā te i latou ai lea mea i le lalolagi uma; ‘ona tu‘ua lea e i latou ‘ona faia o le ‘a‘ai.
9. O le mea lea ‘ua igoa ai ia o Papelu; auā na fa‘a‘ese‘eseina i lea mea e le ALI‘I o le gagana a le lalolagi uma; na fa‘ata‘ape‘ape fo‘i e le ALI‘I ‘iā te i latou ai lea mea i le lalolagi uma.