Feagaiga Tuai

Feagaiga Fou

Iutita 5:19-29 O LE TUSI PA'IA - Ekalesia Katoliko Roma (RSCB)

19. A o aso uma ‘ua latou salamō ai ‘ina ‘ua latou te‘a‘ese i le ‘au‘auna i lo latou Atua, ‘ua foa‘iina ai e le Atua o le lagi ‘iā te i latou le malosi e tete‘e atu i o latou fili.

20. Mulimuli ane, ‘ua latou fa‘ato‘ilaloina tupu o sā Kananā ma sā Iepusē ma sā Faresā ma sā Hetī ma sā Hevī ma sā Amorī, ma le ‘au faipule uma o Hesepona, ma ‘ua latou maua lo latou lau‘ele‘ele ‘atoa ma o latou ‘a‘ai.

21. O aso uma fo‘i sa latou le agasala ai i luma o lo latou Atua, ‘ua manuia ai lava i latou; auā e ‘ino‘ino lo latou Atua i le amio leaga.

22. A o le‘i o‘o fo‘i i tausaga ‘ua fa‘ato‘ā mavae atu nei, na latou ō ‘ese i le ala na tu‘u atu ‘iā te i latou e le Atua ‘ia latou sāvavali i ai, na olopalaina ai i latou i le tau‘a e nu‘u e tele; o le to‘atele fo‘i o i latou ‘ua ‘avea fa‘atagataotau‘a i le nu‘u ‘ese.

23. Mulimuli mai nei, ‘ua latou toe fo‘i atu i le Ali‘i lo latou Atua, ‘ona toe aofa‘iina ai lea i latou a‘i le tāfeaga na tāfea ai i latou, ma ‘ua latou a‘e i nei atumauga uma ma ‘ua latou toe maua Ierusalema, o le mea o i ai lo latou malumalu.

24. O lenei, lo‘u ali‘i e, ‘ia e su‘esu‘e po o i ai sa latou agasala i luma o lo latou Atua; ‘ona tatou a‘e lea e tau ma i latou, auā e tu‘uina lava i latou ‘iā te oe e lo latou Atua, e fa‘ato‘ilaloina fo‘i i latou i lalo o lau pule.

25. Peita‘i, a leai se amio leaga a lenei nu‘u i luma o lo latou Atua, tatou te lē lavā tete‘e atu ‘iā te i latou, auā e puipui lo latou Atua ‘iā te i latou, ‘ae ‘avea i tatou ma tauemuga i nu‘u uma lava.

26. A ‘ua o‘o ‘ina fa‘auma e Akiora o ana ‘upu ia, ‘ona tigā ai lea o ali‘i sili uma o Holofene, ma ‘ua latou manatu e fasioti ‘iā te ia, o fetautalatala‘i i latou:

27. Po o ai lava lenei ‘ina ‘ua fa‘apea mai e mafai ‘ona te‘ena le tupu o Nepukanesa māna ‘au e le fānauga a Isaraelu, o tagata ‘ua leai ni ‘au‘upega, o tagata vaivai ma le lē masani i le tau‘a?

28. O lenei, ‘ia tatou a‘e i le atumauga, ‘ina ‘ia iloa ai e Akiora ‘ua na fa‘asesē ‘iā te i tatou; a uma fo‘i ‘ona pu‘eina o latou ali‘i sili, ‘ona tuia fo‘i o ia i le pelu fa‘atasi ma i latou,

29. ‘ina ‘ia iloa ai e nu‘u uma lava o Nepukanesa o le atua ia o le lau‘ele‘ele ma ‘ua leai se tasi, ‘ua na o ia lava.

Faitau le mataupu e atoatoa Iutita 5