2. ‘ua o‘otia o latou i le tetemū ma le fefe, ne‘i faia ‘iā Ierusalema ma le malumalu o le Ali‘i le mea na faia i ni isi ‘a‘ai ma o latou malumalu.
3. Ma ‘ua latou ‘auina atu ni savali i Samaria ma nu‘u e vagavagai e o‘o atu i Ieriko ma ‘ua latou leoleo tumutumu o mauga uma;
4. ‘ua latou si‘omia o latou ‘a‘ai i ni pavali ma ‘ua latou fa‘aputu saito e nofo sauni ai i le tau‘a.
5. O le ositaulaga fo‘i o Eliakimo na ia tusi atu ‘iā te i latou uma sa nonofo i luma o Eserelona, o le ‘a‘ai lea e i tala mai o le fanua laulelei ma le lautele e lata ane i Totana, ‘atoa ma i latou uma sa mafai ‘ona ala mai ai le fili,
6. ‘ia latou leoleo i malifa o mauga sa mafai ‘ona ala ai i Ierusalema, ‘ia leosa‘i fo‘i o le mea sa mafai ‘ona ui ai i ala vāapiapi i le vā o mauga.
7. Ma ‘ua fai e le fānauga a Isaraelu e tusa ma le mea na poloa‘i ‘iā te i latou e Eliakimo, le ositaulaga a le Ali‘i.
8. Ma ‘ua ‘alalaga atu i le Ali‘i le nu‘u ‘atoa ma le matuā tauānau ma ‘ua latou fa‘amaulalo o latou loto i le anapogi ma le tatalo, o i latou ma o latou fafine.
9. Ma ‘ua ‘o‘ofu ositaulaga i ‘ofu talatala ma ‘ua latou fa‘apunou to‘ele o tama meamea i luma o le malumalu o le Ali‘i ma ‘ua latou ufitia le fatafaitaulaga o le Ali‘i i le ‘ofu talatala;
10. ma ‘ua latou ‘alalaga atu i le Ali‘i, le Atua o Isaraelu, ma le lotogatasitasi, ‘aua ne‘i tu‘uina atu o latou tamaiti ma mea vetea, o a latou avā e fai i ai le vili, ma o latou ‘a‘ai e fai ma fa‘atafunaga, ma lo latou malumalu e fa‘aleagaina, ne‘i ‘avea ai i latou ma ulaga i nu‘u ‘ese.
11. ‘Ona fealua‘i solo lea o le ositaulaga sili a le Atua o Eliakimo i Isaraelu uma ma tautala atu ‘iā te i latou,
12. o fa‘apea atu: ‘Ia ‘outou iloa e fa‘afofoga le Ali‘i ‘iā ‘outou tatalo pe ‘āfai ‘ua ‘outou tūtūmau lava i le anapogi ma talosaga i luma o le Ali‘i.
13. ‘Ia ‘outou manatua Mose, le ‘au‘auna a le Ali‘i; e lē o le tau i le pelu, a o le sagai i talosaga pa‘ia ma ‘ia tuliloaina ai o Amaleka sa fa‘alagolago o ia i lona malosi, ma lona mamana, ma lana ‘au, mōna talitā, mōna nofoa fa‘ata‘avalevale, mana fitafita ti‘eti‘e i solofanua.
14. E fa‘apea fo‘i o fili uma lava o Isaraelu, pe ‘āfai tou te tūtūmau i lenei galuega ‘ua ‘outou amataina.
15. O lana apoapoa‘iga sa latou saga ‘ai‘oi atu ai i le Ali‘i ma tūtūmau ai i luma o le Ali‘i.