Feagaiga Tuai

Feagaiga Fou

Iutita 2:1-8 O LE TUSI PA'IA - Ekalesia Katoliko Roma (RSCB)

1. O le tausaga e sefulu ma le tolu o le nofoa‘iga a le tupu o Nepukanesa, o le aso e luasefulu ma le lua o le ulua‘i masina, na fai ai le i‘uga i le ‘āiga o Nepukanesa le tupu o tagata Asuria, o le a si‘i le tau‘a.

2. Ma ‘ua vala‘au atu i le ‘au matutua uma, ma ta‘ita‘i ‘au uma, mōna tagata tau ma ‘ua taupulepule fa‘alilo fa‘atasi ma i latou.

3. Ma ‘ua fa‘aali atu ai o lona manatu lea, na te fia tu‘uina o nu‘u uma i lalo o lana pule.

4. ‘Ua fiafia o i latou uma i lenā fa‘aaliga, ‘ona vala‘au atu lea le tupu o Nepukanesa ‘iā Holofene, le ta‘ita‘i o ana ‘au,

5. ma ‘ua fa‘apea atu ‘iā te ia: ‘Ia e si‘i le tau‘a i mālō uma o le itū i sisifo, ‘ae maise o nu‘u na latou solia la‘u poloa‘iga.

6. ‘Aua le fa‘apelepele ou mata i se tasi mālō, ‘e te fa‘atūina fo‘i la‘u pule i ‘a‘ai nofo ‘olo uma lava.

7. ‘Ona vala‘au lea e Holofene i ta‘ita‘i ma faipule o le ‘au a Asuria, ma ‘ua na fa‘ala‘ei‘au mo le tau‘a, e pei ‘ona poloa‘i mai ai le tupu, e selau luasefulu afe o ‘au e sāvavali ma le sefulu ma le lua afe o le ‘au fanafana i ū o ti‘eti‘e i solofanua.

8. Ma ‘ua poloa‘i ‘ia muamua atu i ana ‘au le vao kamela e lē mafaitaulia ma mea e tusa ma le tausiga lelei o ana ‘au, ‘atoa ma lafu povi ma lafu mamoe e lē mafaitaulia.

Faitau le mataupu e atoatoa Iutita 2