Feagaiga Tuai

Feagaiga Fou

Iutita 12:11-20 O LE TUSI PA'IA - Ekalesia Katoliko Roma (RSCB)

11. Auā e matagā i le fa‘a-Asuria pe a ula le fafine i le tane, ma te‘a ‘iā te ia a o le‘i talia lona mana‘o.”

12. ‘Ona alu atu lea o Pakoa ‘iā Iutita ma ‘ua fai atu: “‘Aua ne‘i e fefe, le teine lelei e, ‘ona alu atu i lo‘u ali‘i, ‘ina ‘ia fa‘amamaluina oe i ona luma, ‘ina ‘ia e ‘ai fa‘atasi ma ia ma inu uaina ai ma le fiafia.”

13. A ‘ua tali mai o Iutita ‘iā te ia: “O ai ‘ea a‘u ‘ou te finau atu i lo‘u ali‘i?

14. ‘Ou te faia mea uma lava ‘ua lelei ma ‘ua malie i lona manatu; o mea uma fo‘i e loto malie ai o ia, o mea fo‘i ia e sili ‘ona lelei ‘iā te a‘u i aso uma o lo‘u ola.”

15. ‘Ona tula‘i lea o ia, ‘ua ‘ofu o ia i ona ‘ofu lelei, ‘ona ulufale ai lea ma tu i ona luma.

16. A ‘ua tetemū le loto o Holofene, auā sa mū lona loto i le tu‘inanau ‘iā te ia.

17. Ma ‘ua fai atu o Holofene ‘iā te ia: “‘Ia e inu nei ma e ta‘oto ma le fiafia, auā ‘ua alofaina lava oe i lo‘u loto.”

18. Ma ‘ua fai mai o Iutita ‘iā te ia: “‘Ou te inu lava, lo‘u ali‘i e, auā e ui i aso uma o lo‘u ola, a o le aso nei lava ‘ua sili ‘ona fa‘amamaluina ai o lo‘u agaga.”

19. ‘Ona ia tago lea i mea na saunia mo ia e lana ‘au‘auna ma ‘ua ia ‘ai ma inu i ona luma.

20. Ma ‘ua fiafia tele o Holofene ‘iā te ia ma ‘ua matuā inu tele na‘uā i le uaina, e le‘i fa‘apenā lava ‘ona inu talu mai ‘ona ola o ia.

Faitau le mataupu e atoatoa Iutita 12