1. ‘Ae le pouliuli pea i le nu‘u ‘ua puapuagātia; fa‘apei ‘ona ia fa‘alēaogāina anamua o le nu‘u o Sepulona ma le nu‘u o Nafatali; e fa‘apea ‘ona ia fa‘amamaluina ai i ona po amulī; o le ala i le vai, o le mea i tala ane o Ioritana, o Kalilaia o nu‘u ‘ese.
2. O le nu‘u sa sāvavali i le pouliuli,‘ua latou iloa le malamalama tele.O ē sa nonofo i le nu‘u o le ata o le oti,‘ua pupula mai ‘iā te i latou le malamalama.
3. ‘Ua e fa‘ato‘ateleina le nu‘u,‘ua e fa‘ateleina lo latou fiafia.Latou te fiafia i ou luma,e pei ‘ona fiafia i le seleselegāsaito,e pei ‘ona ‘oli‘oli o i latou o ē tufatufa vete.
4. Auā ‘ua e gauia le amo o lana avega,ma le sasa na i lona ua.O le to‘oto‘o o lē na sauā ‘iā te ia,pei ‘ona fai i le aso o Mitiana.
5. Auā o se‘evae uma o ē ‘ua fa‘ase‘eina,‘ua ta‘alili i le tau‘a, ma le ‘ofu ‘ua liloia i le toto,e susunuina ia mea, e fai fo‘i ma fafie o le afi.
6. Auā ‘ua fānau mai mo i tatou le tama,‘ua foa‘iina mai mo i tatou le atali‘i,e i lona ‘ua lē mālō.E igoa fo‘i o ia, o le Silisili‘ese,o le Faipule, o le Atua malosi,o le Tama o le fa‘avavau, o le Ali‘i o le filemū.
7. E leai se mea e gata mai ai ‘ona teleo lona mālō ma le filemūo lona mālō i le nofoāli‘i o Tavita ma lona mālō.E fa‘atumauina ma fa‘amausalī i le fa‘amasinoga ma le amiotonu,e āfua mai i ia ona po e o‘o i le fa‘avavau,e faia lea mea i le mā‘elegā o le ALI‘I o ‘au.
8. Na tu‘uina mai e le Ali‘i lana afioga ‘iā Iakopo,‘ua pa‘ū mai fo‘i ‘iā Isaraelu.
9. E iloa ai fo‘i e le nu‘u uma,o Efaraima ma ē o nonofo i Samaria,o lo‘o fa‘apea mai i le fa‘amaualugama le fa‘afefeteina o latou loto.
10. “‘Ua solo ma‘a ‘omea,‘ae matou te ati a‘e i ma‘a talai;‘ua tatu‘uina sukamoru,‘ae matou te sui i arasi.”
11. O le mea lea e fa‘aosoina atu ai ‘iā te i latoue le ALI‘I o ē ‘ua ita ‘iā Resina,na te avatua fo‘i ‘au‘upega i ē ‘ua ita ‘iā te i latou;
12. o Suria i luma ma Filisitia i tua,latou te ‘aina lava Isaraelu ma le gutu ‘ua fa‘amaga.E ui lava i ia mea uma, e le‘i liliu ‘ese lona to‘asā,‘ae fa‘aloaloa pea lona ‘a‘ao.