20. ‘Oi talofa ‘iā te i latou o ē fai mai,‘ua lelei le mea leaga,‘ae leaga le mea lelei;o ē fai ma malamalama le pouliuli,‘ae fai fo‘i ma pouliuli le malamalama;o ē fai ma mea suamalie le mea ‘o‘ona,‘ae fai ma mea ‘o‘ona le mea suamalie.
21. ‘Oi talofa i ē ‘ua popoto i o latou lava manatu,ma ē ‘ua fai ma tagata mafaufau i o latou lava tāofi.
22. ‘Oi talofa i ē malolosi e inu uaina,o ē fai ma tagata totoa fo‘i e palu ai le ‘ava.
23. O ē ta‘uamiotonuina le pagotā ‘ona o le taui,‘ae ‘ave‘eseina le amiotonu a ē amiotonu.
24. O lenei, fa‘apei ‘ona ‘aina o tagutugutu saito i le mumū o le afi,e pei ‘ona pa‘u‘ū fo‘i le mutia magumagu ‘ua mū,e fa‘apea fo‘i ‘ona pala o latou a‘a.E pusa a‘e fo‘i lo latou fuga e pei o le efuefu;auā ‘ua latou lafoa‘i le tulafono a le ALI‘I o ‘au,‘ua latou ‘ino‘ino fo‘i i le afioga a le Pa‘ia o Isaraelu.
25. O le mea lea ‘ua tele ai le to‘asā o le ALI‘I i lona nu‘u,ma ‘ua fa‘aloaloa ai lona ‘a‘ao i luga ‘iā te i latou,ma ‘ua fasia i latou, ‘ua gatete ai mauga,o latou tino oti fo‘i ‘ua pei o otaota i le moa o le ala.E ui lava i nā mea uma, ‘ae le‘i liliu ‘ese lona to‘asā,‘ae fa‘aloaloa pea lona ‘a‘ao.
26. E si‘i i luga fo‘i e ia le tagāvai i nu‘u ‘ese o mamao,na te mapumapu atu fo‘i ‘iā te i latou i tulu‘iga o le lalolagi;fa‘auta fo‘i, latou te fa‘ata‘alise‘ona vave ō mai.
27. E leai so latou e vaivai,e leai fo‘i se tasi e tautevateva;e le tulemomoe i latou,latou te lē momoe lava;e le tatalaina fusi o latou sulugātiti,e le motusia fo‘i nonoa o latou se‘evae.
28. E ma‘ama‘ai a latou ū fanafana,e lolo‘u fo‘i a latou ‘aufana uma;e fa‘atusaina atigivae o a latou solofanua i alā,o a latou mea ta‘avavale fo‘i e pei o le asiosio.
29. O lo latou tagi e pei o le leona fafine,latou te tagi pei o leona ta‘anoa;latou te tagi ma pupu‘e manu,latou te ‘avea ai lava, e leai fo‘i sē na te lavea‘iina.