13. A o leai lava ni aso, o a‘u lava o ia;e leai fo‘i sē na te lavea‘iina nai lo‘u lima;‘ou te faia, a o ai sē na te fa‘alēaogāina?
14. O lo‘o fa‘apea ‘ona fetalai mai o le ALI‘I:O lē na fa‘atauina ‘outou, o le Pa‘ia o Isaraelu;‘ona o ‘outou ‘ua ‘ou ‘a‘auina atu nisi i Papelonia,ma a‘u ‘aveina ifo le sola‘aga, o i latou uma lava,‘atoa ma Kaletaia, o lo‘o ‘alalaga i latou i va‘a.
15. O a‘u o le ALI‘I, o lo ‘outou Ali‘i Pa‘ia;o lē na faia Isaraelu, o lo ‘outou Tupu.
16. O lo‘o fa‘apea ‘ona fetalai mai o le ALI‘I,o lē na faia le ala i le sami,ma le magāala i le sami sousou tele.
17. O lē ‘aumaia le kariota ma le solofanua,o ‘au ma e fitafita; ‘ua latou ta‘o‘oto fa‘atasi.‘Ua latou le toe tula‘i, ‘ua tineia i latou,‘ua pepē e pei o le vavae o le lamepa.
18. ‘Aua tou te manatua mea na muamua,‘aua fo‘i le mafaufau i mea anamua.
19. Fa‘auta, ‘ou te faia se mea e fa‘ato‘ā iloa,e tupu a‘e nei lava; tou te lē iloa ‘ea?E moni, ‘ou te faia se ala i le vao lafulafuā,ma vaitafe i le nu‘u naumati.
20. E vi‘ia a‘u e manu o le vao, o luko ma iaena;auā ‘ou te avatu vai i le vao lafulafuā.O vaitafe i le nu‘u naumati;e feinu ai lo‘u nu‘u ‘ua ‘ou filifilia.
21. O le nu‘u lenei na a‘u faia mo a‘u;latou te ta‘uatua lo‘u vi‘iga.
22. ‘Ua fetalai mai le ALI‘I:A ‘ua e lē vala‘au mai ‘iā te a‘u, o oe Iakopo e;auā ‘ua e musu ‘iā te a‘u, o oe Isaraelu e.
23. ‘Ua e lē ‘aumaia ‘iā te a‘u o mamoe o au taulaga mū;‘ua e lē vi‘ia fo‘i a‘u i au taulaga;‘ua lē mafatia oe e a‘u i taulaga i mea e ‘ai,‘ua ‘ou lē fa‘atigāina fo‘i oe i le pulu lipano.
24. ‘Ua e le fa‘atau mo a‘u ni kani i tupe;‘ua lē ‘aumai ‘iā te a‘u le ga‘o o au taulaga ‘ia a‘u malie ai.‘Ae peita‘i ‘ua mafatia a‘u e oe i au agasala,‘ua fa‘atigāina a‘u i au amio leaga.
25. O a‘u, o a‘u lava lē sōloi‘esea au solitulafono,‘ona o a‘u lava; o au agasala fo‘i ‘ou te lē manatua ia.
26. ‘Ia fa‘amanatu mai ‘iā te a‘u,ia tā fefa‘amasinoa‘i; ta‘u mai ia oe,‘ina ‘ia ta‘uamiotonuina ai oe.
27. O lou tamā e sili, ‘ua agasala ia;ma ou a‘oa‘o ‘ua latou fōua a‘u.
28. O le mea lea ‘ua gafua ai ‘iā te a‘u ali‘i o le malumalu;‘ua ‘ou tu‘uina fo‘i Iakopo ‘ia fa‘afanoina,ma Isaraelu ‘ia fa‘alumaina.