5. ‘Ona fa‘aalia mai ai lea o le pupula o le ALI‘I,e va‘aia lava e tagata uma fa‘atasi;auā ‘ua fetalai mai ai le fofoga o le ALI‘I.”
6. ‘Ua fai mai le leo,“‘Inā ‘alaga ia.”‘Ona fai atu lea o ia, “Se a ‘ea se ‘upu ‘ou te ‘alagaina?”O tagata uma o le mutia i latou ma lo latou lelei uma,e tusa lea ma le fuga o le vao.
7. E magumagu le mutia, e to‘ulu le fuga;auā o le mānava o le ALI‘I ‘ua agi mai i ai;e moni o le mutia lava le nu‘u.
8. E magumagu le mutia, e to‘ulu le fuga;a o le afioga a lo tatou Atua, e tumau lea e fa‘avavau.
9. Alu a‘e i le mauga maualuga,o oe lē ‘aumai le tala lelei ‘iā Siona.‘Ia matuā leo tele,o oe lē ‘aumai le tala lelei ‘iā Ierusalema.‘Ia leo tele, ‘aua le fefe; fai atu i ‘a‘ai o Iuta,“Fa‘auta i lo ‘outou Atua.”
10. Fa‘auta, e afio mai le Ali‘i le ATUA ma le malosi,e pule lona ‘a‘ao mo ia.Fa‘auta ‘ua ‘iā te ia lana taui,‘ua i ona luma le totogi o lana galuega.
11. Na te leoleoina lona lafu e pei o le leoleo mamoe;na te sapaia tama‘i mamoe i ona lima,ma tau‘ave i latou i lona fatafata;na te ta‘ita‘i filemū i mamoe ‘ua fānanau.
12. O ai ‘ea ‘ua na fuatia le sami i lona alofilima,ma na fuatia le lagi i le aga,ma na fuatia le ‘ele‘ele o le lalolagi i le fua fa‘a‘ofu‘ofu;‘ua na fuatia mauga fo‘i i le fua, ma mauga iti i le fua fa‘atautau?
13. O ai ‘ea ‘ua fuatia le atamai o le ALI‘I?O ai fo‘i se tagata e pulega fa‘atasi ma ia,‘ua na a‘oa‘oina o ia?
14. O ai ‘ea sē na la filifili fa‘atasi ma ia,ma na a‘oa‘o ‘iā te ia,ma na a‘oa‘o ‘iā te ia i le ala o le fa‘amasinoga;ma na a‘oa‘o ‘iā te ia ‘ia poto ai,ma na fa‘ailoa ‘iā te ia le ala o le fa‘autauta?
15. Fa‘auta, ō atu nu‘u e tusa i latou ma si mea e sisina ifo nai le pakete;e fa‘atatauina i latou e pei o le efuefu i le fua fa‘atautau;fa‘auta, na te si‘itia nu‘u tu tai e peiseaī sina mea nini‘i lava.
16. E le lava fo‘i Lepanona ‘ina ‘ua mū a‘i le afima manu o i ai, e le lava ai se taulaga mū.
17. O atu nu‘u uma peiseaī ‘ua leai i ona luma;‘ua matuā leai lava i latou i lona manatu,ma ‘ua matuā fa‘atauva‘a lava.
18. O lenei, tou te fa‘atusa le Atua ‘iā te ai?Se a fo‘i se fa‘atusa tou te fa‘atusaina ai o ia?
19. O le tufuga na te gaosia le tupua u‘amea,ma lē fai mea u‘amea na te ufiufi ai i le auro;na te gaosia filifili ario.