22. O ia lē ti‘eti‘e i luga o le fa‘ata‘ali‘oli‘o o le lalolagi,a o ē nonofo ai e tutusa i latou ma sē.O ia lē fofola le lagi e pei o se ‘ie manifinifi;na te fa‘amafolafolaina ai fo‘i e pei o se fale ‘ie e nofo ai.
23. Na te liua ali‘i ia leai;o fa‘amasino o le lalolagi‘ua faia i latou e ia e tusa ma se mea fa‘atauva‘a.
24. ‘Ua lē totōina lava i latou,‘ua lē lūlūina lava ni o latou fua,‘ua lē mau a‘a lava i le ‘ele‘ele lo latou pogai.‘Ua na ‘ona ulafia i latou e ia,‘ona mamago ai lea o i latou,e ‘avea fo‘i i le afā e pei o le tagutugutu o saito.
25. O lenei, po o ai ‘ea tou te fa‘atusa i ai a‘u?Po o ai fo‘i ma te tutusa?‘ua fetalai mai ai lē Pa‘ia.
26. Se‘i tetepa a‘e i luga ma ‘outou va‘ai.Po o ai ‘ea ‘ua na faia nei mea?Na te ta‘ita‘iina mai a latou ‘au ‘ua faitauina;na te vala‘au ‘iā te i latou uma i o latou igoa;‘ona o le tele o lona malosi ma lona mana tele;e leai so latou e lē iloa.
27. Iakopo e, se a le mea ‘e te fai ane ai?Isaraelu e, se a le mea ‘e te fa‘apea ai,“‘Ua lilo lo‘u ala i le ALI‘I,‘ua tu‘ua fo‘i lo‘u fa‘amasinoga e lo‘u Atua?”
28. ‘E te lē iloa ‘ea? ‘E te le‘i fa‘alogo ai ‘ea?O le Atua o le vavau,o le ALI‘I o lē na faia tulu‘iga o le lalolagi.E lē vaivai o ia, e le tigāina fo‘i,e lē masu‘esu‘eina lona mafaufau.
29. Na te avatua le malosi i ē ‘ua vaivai;a o ē ‘ua leai se malosi, na te fa‘atuputele i ai le malosi.
30. E vaivai ma tigāina tama matutua;o taulele‘a fo‘i, e pa‘u‘ū lava i latou.
31. A o ē fa‘atalitali i le ALI‘I,e toe fa‘afouina lo latou malosi.Latou te si‘i a‘e ‘apa‘au e pei o aeto;latou te tamomo‘e, ‘ae lē vaivai;latou te sāvavali, ‘ae lē tigāina.