1. ‘Oi talofa ‘iā Arielu, o Arielu,o le ‘a‘ai sa nofo ai Tavita.‘Inā fa‘aopoopo ia o lea tausaga ma lea tausaga;‘ia latou fai pea fo‘i o tausamiga.
2. ‘Ae peita‘i ‘ou te fa‘atigāina Arielu;e i ai le fa‘anoanoa ma le fa‘avauvau;e ‘iā te a‘u fo‘i o ia e pei o Arielu.
3. ‘Ou te tolauapi e vagavagai ‘iā te oe;‘ou te si‘osi‘o ‘iā te oe i ‘au;‘ou te fa‘atūina atu fo‘i ‘olo e tau ai ma oe.
4. E tu‘uina oe i lalo, e tautala mai oe mai le ‘ele‘ele,e leo itiiti mai au ‘upu mai le efuefu;o lou leo fo‘i e o‘o mai mai le ‘ele‘ele e pei o lē ‘ua i ai le aitu vavalo;‘e te leo i‘i fo‘i mai le efuefu.
5. E pei o le efuefu nini‘i le to‘atele o ē ‘ua ita ‘iā te oe;o le to‘atele fo‘i o ē ‘ua mata‘utia e pei o aputi e lelea i latou;e fa‘afuase‘i ‘ua se ‘emo lava ‘ona o‘o mai.
6. E asiasia oe e le ALI‘I o ‘aui le faititili ma le mafui‘e ma le ta‘alili tele;o le asiosio ma le afā ma le mumū o le afi e fa‘aumatia ai.
7. E pei o le miti, o le mea e va‘aia i le po,e fa‘apea fo‘i le vao tagata o nu‘u uma o ē tau ma Arielu,o i latou uma o ē tau ma ia ma ona ‘olo,‘atoa ma i latou o ē fa‘atigā ‘iā te ia.
8. E pei o lē ‘ua fia ‘ai o lo‘o fai lana miti,fa‘auta, ‘ua ‘ai lava ia; a ‘ua ala mai,‘ua lāina lava ia;e pei o lē ‘ua fia inu fo‘i o lo‘o fai lana miti,fa‘auta, ‘ua inu ia; a ‘ua ala mai,fa‘auta, ‘ua mole, ‘ua fia inu lava ia;e fa‘apea lava le vao tagata o nu‘u uma o ē tau i le mauga o Siona.