6. e ‘avea fo‘i ma atamai e fa‘amasino ai i lē nofo e fai le fa‘amasinoga,e ‘avea fo‘i ma malosi, i ē o fa‘afoisia le tau‘a i le faitoto‘a.
7. ‘Ae peita‘i o i latou, ‘ua sesē i latou i le uaina;‘ua fesēsēa‘i i le ‘ava; ‘ua sesē le ositaulaga ma le perofeta i le ‘ava;‘ua faia‘ina i latou i le uaina, ‘ua fesēsēa‘i latou i le ‘ava;‘ua sesē lo latou va‘ai, ‘ua latou tautevateva i le fa‘amasinoga.
8. Auā ‘ua tūtūmu la‘o‘ai uma i pua‘iga ma otaota,e leai lava se mea ‘ua sao.
9. “Na te a‘oa‘o atu ‘ea ‘iā te ai i le poto?Na te fa‘ailoa ‘ea ‘iā te ai le tala?O ē ‘ua te‘a ma le suāsusu,‘ua fa‘ate‘aina lava ma le susu.
10. Auā o lo‘o i ai le ‘upu ma le ‘upu,o le ‘upu ma le ‘upu;o le vavao ma le vavao,o le vavao ma le vavao;o sina mea itiiti ‘i‘inei ma sina mea itiiti ‘i‘inā.”
11. Auā e tautala atu o ia i lenei nu‘ui ‘upu e le matala ma le gagana ‘ese.
12. Na ia fai atu fo‘i ‘iā te i latou,“O le mālōlōga lenei;‘ia ‘outou avatua le mālōlōga i ē ‘ua lailoa;o le mālōlōga fo‘i lenei;”a ‘ua latou lē mafafai ‘ona fa‘alogo mai.
13. E i ai fo‘i le afioga a le ALI‘I ‘iā te i latou,“O le ‘upu ma le ‘upu, o le ‘upu ma le ‘upu;o le vavao ma le vavao, o le vavao ma le vavao;o sina mea itiiti ‘i‘inei ma sina mea itiiti ‘i‘inā;”‘ina ‘ia latou sāvavali ma pa‘u‘ū taliagama ‘ia momomo, ‘ia maileia fo‘i ma ‘ia maua i latou.
14. O le mea lea ‘ia ‘outou fa‘alogologo mai ai i le afioga a le ALI‘I,‘outou tagata fa‘atauemu, o ē pule i lenei nu‘u o lo‘o i Ierusalema;
15. auā ‘ua ‘outou fa‘apea mai, “‘Ua osia la matou feagaiga ma le oti;‘ua fai fo‘i la matou feagaiga ma seoli;a ui ane le sasa e lofia ai,e lē o‘o mai lea ‘iā te i matou;auā ‘ua matou faia le pepelo mo matou malu;‘ua matou lalafi fo‘i i tala ‘o‘ole.”
16. O lenei, o lo‘o fa‘apea ‘ona fetalai mai o le Ali‘i le ATUA,Fa‘auta, ‘ou te tu‘uina i Siona le ma‘a e fai ma fa‘avae;o le ma‘a ‘ua uma ona fa‘ata‘ita‘iina,o le ma‘a tulimanu tāua,o le fa‘avae ‘ua mau;“O lē fa‘atuatua ‘iā te ia e le popole lava ia.”
17. ‘Ou te faia le fa‘amasinoga ‘ia fa‘atatauina i le fua fa‘ata‘oto,‘ou te faia fo‘i amiotonu ‘ia fa‘atatauina i le fua fa‘atautau;e tāfea le mālū o le tala pepelo i le uato‘a,e lofia fo‘i le lafitaga i le vai.