1. O le tausaga na sau ai Taretana i Asetota, ‘ina ‘ua ‘auina o ia e Sarekona le tupu o Asuria, na ia tau fo‘i ma Asetota, ‘ua ā‘ea ai;
2. o ona po ia ‘ua fetalai mai ai le ALI‘I ‘iā Isaia le atali‘i o Amota, ‘ua fa‘apea mai, “Alu ia, ‘inā e tatala ‘ese le ‘ie talatala i lou sulugātiti ma ia ē tō ‘ese ‘ou se‘e i ou vae;” ‘ona faia lava lea e ia, ‘ua savali e lē ‘ofu ma ona vae ‘ua lē fa‘ase‘eina.
3. ‘Ona fetalai mai lea o le ALI‘I, “E fa‘apei ‘ona savali o la‘u ‘au‘auna o Isaia e lē ‘ofu, e lē fa‘ase‘eina, i tausaga e tolu, o le fa‘ailoga ma le fa‘atusa ‘iā Aikupito ma Aitiope;
4. e fa‘apea lava ‘ona ta‘ita‘iina atu e le tupu o Asuria ē ‘ua fa‘atagataotau‘aina o Aikupito ma le tāfeaga o Aitiope, o taulele‘a ‘atoa ma toeaina, e lē o ‘ofu ma o latou vae e lē fa‘ase‘eina ma o latou nofoaga ‘ua lē ufitia, o le mea e māsiasi ai Aikupito.
5. ‘Ona latou fefefe ai lea ma latou māsiasi lava ‘ona o Aitiope sa latou fa‘amoemoe i ai, ‘ona o Aikupito fo‘i sa latou mitamita ai.
6. ‘Ona fai ane ai lea i lea aso o lē ‘ua mau i lenei nu‘u e tuā‘oi ma le sami, ‘Fa‘auta, e fa‘apea lava lē sa tatou fa‘amoemoe i ai, sa tatou sōsōla i ai e maua ai se fesoasoani, ‘ina ‘ia lavea‘iina i tatou a‘i le tupu o Asuria; pe fa‘apefea fo‘i ‘ona sao o i tatou?’”
Faitau le mataupu e atoatoa Isaia 20