1. ‘Ua fa‘alogo tupu uma o sa Amorī sa i le itū o Ioritana i sisifo, ma tupu uma o sa Kananā e lata ane i le sami, ‘ua fa‘amateina e le ALI‘I le vai o Ioritana i luma o le fānauga a Isaraelu ‘ua tatou sopo‘ia mai ai, ‘ona fa‘avaivaia ai lea o latou loto, ‘ua lē toe ai se malosi ‘iā te i latou, ‘ona o le fānauga a Isaraelu.
2. O ona po ia na fetalai mai ai le ALI‘I ‘iā Iosua, “‘Ia e faia ma oe polo fatu, ma toe fa‘aperitomeina le fānauga a Isaraelu, o le atu lua lea.”
3. ‘Ona faia lea e Iosua o polo fatu, ma fa‘aperitomeina le fānauga a Isaraelu i Kipeaaralota.
4. O le mea fo‘i lenei na fai ai e Iosua le fa‘aperitomeina; o tane o le nu‘u uma, na ō mai mai Aikupito o ‘au uma o le tau‘a, ‘ua oti i latou i le vao i le ala ‘ina ‘ua latou ō mai mai Aikupito.
5. Auā sa fa‘aperitomeina le nu‘u uma na ō mai mai Aikupito a o le nu‘u uma na fānau i le vao i le ala ‘ina ‘ua latou ō mai mai Aikupito na lē fa‘aperitomeina i latou.
6. Auā na sāvavali le fānauga a Isaraelu i le vao i tausaga e fagafulu, ‘ua o‘o ‘ina fa‘aumatia le nu‘u uma, o ‘au o le tau‘a, o ē na ō mai mai Aikupito, auā na latou lē fa‘alogo i le si‘ufofoga o le ALI‘I; o i latou na tautō ai le ALI‘I na te lē mafaia ‘ona fa‘ailoa atu ‘iā te i latou le nu‘u na tautō ai le ALI‘I i o latou tamā e foa‘i mai ‘iā te i tatou, o le nu‘u e tafe ai le suāsusu ma le meli.
7. O a latou fānau na fa‘atupuina e ia e fai mo latou sui, na fa‘aperitomeina i latou e Iosua; sa lē peritomeina i latou, auā na latou le fa‘aperitomeina i latou i le ala.
8. ‘Ua uma ‘ona fa‘aperitomeina o le nu‘u uma, ‘ona latou nonofo ai lea i mea e nonofo ai i latou i le toagalauapi, se‘ia mālōlō ai i latou.