1. ‘Ua tula‘i Iosua i le taeao lava; ‘ua tu‘ua e i latou o Setima, ma ō atu i Ioritana, o ia ‘atoa ma le fānauga uma a Isaraelu, ‘ua latou nonofo ai i lea mea a o le‘i sopo‘ia atu e i latou o Ioritana.
2. ‘Ua mavae aso e tolu, ‘ona feoa‘i lea o le ‘au faipule i le toagalauapi;
3. ‘ua latou fai atu fo‘i i le nu‘u, ‘ua fa‘apea atu, “A ‘outou iloa atu le ‘atola‘au o le feagaiga a le ALI‘I lo ‘outou Atua, o ‘ave e ositaulaga o sa Levī, ‘ona tu‘ua lea e ‘outou o le mea tou te i ai, ma ‘outou mulimuli atu i ai.
4. A ‘ia fai se vā e vā a‘i ‘outou ma le ‘atola‘au, pe lua ni afe o kupita pe a fuatia; ‘aua tou te fa‘alatalata atu i ai, ma ‘ia ‘outou iloa le ala tou te ui ai; auā e le‘i ui e ‘outou, lenei ala anamua.”
5. ‘Ua fai atu fo‘i Iosua i le nu‘u, “‘Inā fa‘apa‘iaina ia ‘outou e ‘outou; auā e a taeao e faia e le ALI‘I o vāvega i o ‘outou luma.”