1. “O i ai lava le mea e maua ai le ario,ma le mea mo le auro latou te fa‘amamāina ai.
2. E maua le u‘amea i le ‘ele‘ele,e tunu ‘ia liu suāvai le ma‘a e maua ai ‘apamemea.
3. E fa‘agataina e le tagata le pouliuli e matuā su‘esu‘eina fo‘i e ia mea uma;o ma‘a o i ai i le pouliuli ma le ata o le oti.
4. E ‘elia e ia le lua maulalō e mamao ma le mea e nonofo ai tagata,e fa‘agalogaloina e le vae;‘ua latou tautau ma tāupe e mamao a‘e ma tagata.
5. E tupu mai mea e ‘ai i le lau‘ele‘ele;o ona lalo fo‘i pe a suatia e i ai e peiseaī o le afi.
6. O ona ma‘a o le mea lea e i ai safaira,e i ai fo‘i efuefu auro.
7. “O le ala i ai e lē iloa e le manulele e fe‘ai,e lē va‘ai i ai fo‘i mata o le lulu.
8. E lē sāvavali i ai manu fe‘ai,e lē ui i ai le leona.
9. “E tago atu le lima o le tagata i le papa alā,na te fulisia mauga ai o latou vae mauga.
10. E foa e ia alāvai i papa;e va‘ai atu fo‘i ona mata i mea tāua uma.
11. E punitia e ia vaitafe ‘ia lē tulutulu ifo;na te ‘aumai fo‘i i le malamalama le mea sa lilo.
12. “A o le poto e maua lea ifea?Po o ifea fo‘i le mea o i ai le mafaufau?
13. E lē iloa e le tagata sona tau;e lē maua fo‘i i le nu‘u o tagata ola.
14. ‘Ua fai mai le moana; ‘E lē o i ai lea ‘iā te a‘u;’‘ua fai mai fo‘i le sami, ‘E lē o ‘iā te a‘u.’