1. ‘Ona tali atu ai lea o Iopu, ‘ua fa‘apea atu,
2. “O lenei lava aso ‘ua tele ai lo‘u tagi;‘ua mamafa ifo le ‘a‘ao ‘ua o‘o mai ‘iā te a‘u e sili i lo‘u mapuitigā.
3. E, tā fia iloa po o ifea le mea ‘ou te maua ai o ia;‘ia ‘ou o‘o atu lava i lona afio‘aga!
4. ‘Ou te sauni atu i ona luma la‘u finauga,ma fa‘ateleina a‘u ‘upu e fa‘atonu atu ai.
5. ‘Ou te iloa ai ana afioga na te tali mai ai ‘iā te a‘u;‘ou te fa‘alogo atu ai fo‘i pe se a lana e fetalai mai ai ‘iā te a‘u.
6. E finau mai ‘ea o ia ‘iā te a‘u i lona malosi tele?E leai; ‘ae manatu mai lava o ia ‘iā te a‘u.
7. ‘Ona fai ai lea e lē ‘ua amiotonu le fa‘atonuga ma ia;‘ona ‘ou sao ai lea e fa‘avavau i lē na te fa‘amasino mai ‘iā te a‘u.
8. “Fa‘auta mai, ‘ou te alu atu i luma, ‘ae lē o i ai o ia,ma tua fo‘i, ‘ae ‘ou te lē iloa o ia.
9. ‘Ou te alu i le itū tauagavale o lo‘o galue ai o ia, ‘ae ‘ou te lē maua o ia;‘ua ufitia o ia i le itū taumatau, ‘ou te lē va‘aia fo‘i o ia.
10. ‘Ae peita‘i ‘ua silafia e ia lo‘u lava ala;a tofotofoina a‘u, ‘ou te sao atu ai e pei o le auro.
11. ‘Ua tumau o‘u vae i ona tulaga‘a‘ao;‘ua ‘ou tausisi i lona ala, ‘ua ‘ou le liliu ‘ese ai lava.
12. ‘Ua ‘ou lē alu ‘ese fo‘i i le poloa‘iga a ona laufofoga;‘ua sili lo‘u tausi i afioga a lona fofoga i a‘u sauniga.