Le mataupu

  1. 1
  2. 2
  3. 3
  4. 4

Feagaiga Tuai

Feagaiga Fou

Iona 4 O LE TUSI PA'IA - Ekalesia Katoliko Roma (RSCB)

O le Ita o Iona ma le A‘oa‘iga a le Atua ‘iā te Ia

1. ‘Ua matuā leaga lava lenei mea ‘iā Iona, ‘ua ita lava o ia.

2. ‘Ona tatalo ai lea o ia i le ALI‘I ‘ua fa‘apea atu, “O lenei, le ALI‘I e, e lē o la‘u ‘upu ‘ea lenei ‘ina ‘ou i ai i lo‘u nu‘u? O le mea fo‘i lea na ‘ou mua‘i sola ai i Tasesa; auā ‘ua ‘ou iloa oe o le Atua alofa fua, ma le alofa mutimutivale, e telegese lou to‘asā, ‘ua tele fo‘i lou alofa, ‘ua e salamō fo‘i ma ‘ua lē fa‘ao‘o le malaia.

3. O lenei fo‘i, le ALI‘I e, ‘ou te ‘ai‘oi atu ‘iā te oe, ‘ia e ‘ave ‘ese lo‘u ola; auā e lelei ‘ona ‘ou oti, ‘ae leaga ‘ona ‘ou ola.”

4. ‘Ona fetalai mai ai lea o le ALI‘I, “‘Ua lelei ‘ea lou ita?”

5. ‘Ona alu atu lea o Iona a‘i le ‘a‘ai, ‘ua nofo fo‘i i le itū i sasa‘e o le ‘a‘ai, ‘ua na faia fo‘i mo ia i lea mea le fale apitaga, ‘ua nofo i ona lalo i le paolo, se‘ia iloa e ia pe se a se mea e o‘o i le ‘a‘ai.

6. Na saunia fo‘i e le ALI‘I le Atua le kikaiona, ‘ua na fa‘asosolo i ai i luga o Iona, e fai ma fa‘apaologa o lona ulu, o lavea‘i ‘iā te ia a‘i tigā. ‘Ona matuā fiafia ai lea o Iona ‘ona o le kikaiona.

7. ‘Ua o‘o ‘ina malama a‘e o le taeao, ‘ona saunia lea e le Atua o le anufe; ‘ua atia fo‘i e le anufe o le kikaiona, ‘ona mago ai lea.

8. ‘Ua alu a‘e le lā, ‘ona saunia lea e le Atua o le matagi vevela mai sasa‘e; ‘ona ogotia ai lea o le ulu o Iona i le lā, ‘ona vaivai ai lea o ia ma ia fa‘atoga atu ‘ia oti o ia, ‘ua ia fa‘apea atu, “E lelei ‘ona ‘ou oti, ‘ae leaga ‘ona ‘ou ola.”

9. ‘Ona fetalai mai lea o le Atua ‘iā Iona, “E lelei ‘ea lou ita ‘ona o le kikaiona?”‘Ona fai atu lea o ia, “‘Ou te ita tele lava, e o‘o lava i le oti.”

10. ‘Ona fetalai mai lea o le ALI‘I, “‘Ua e alofa i le kikaiona, o le mea na e le galue ai, pe fa‘atupuina; o le mea na tupu i le po e tasi, na mamae fo‘i i le po e tasi.

11. O a‘u fo‘i ‘ou te lē alofa ‘ea i Nineva le ‘a‘ai tele, o lo‘o i ai tagata e sili ‘ona to‘atele i le selau afe ma afe e luafulu, o ē lē iloa o latou lima taumatau po o latou lima tauagavale; ma manu vaefā fo‘i e tele.”#