Feagaiga Tuai

Feagaiga Fou

Iona 3:1-9 O LE TUSI PA'IA - Ekalesia Katoliko Roma (RSCB)

1. ‘Ona o‘o mai lea o le afioga a le ALI‘I ‘iā Iona, o le fo‘i fa‘alua mai lea, ‘ua fa‘apea mai,

2. “‘Inā tula‘i ia, ‘inā alu i Nineva le ‘a‘ai tele ma tala‘i atu i ai le tala‘iga ‘ou te fai atu ai ‘iā te oe.”

3. ‘Ona tula‘i ai lea o Iona, ‘ua alu i Nineva, e fa‘apei ‘ona fetalai mai o le ALI‘I o le ‘a‘ai matuā tele lava Nineva, e tusa ma le sāvaliga o aso e tolu.

4. ‘Ua amata ‘ona ulu atu o Iona i le ‘a‘ai, o le sāvaliga o le aso e tasi, na ‘alaga fo‘i o ia, ‘ua fa‘apea atu, “E toe fagafulu po ‘ona fa‘aumatia lea o Nineva.”

5. ‘Ona talitonu ai lea o tagata o Nineva i le Atua, ‘ua tala‘i atu fo‘i e i latou la latou anapogi, ‘ua latou ‘o‘ofu fo‘i i le ‘ie talatala, o ali‘i ‘atoa ma tagatanu‘u.

6. Auā ‘ua o‘o le tala i le tupu o Nineva, ‘ona tula‘i ai lea o ia i lona nofoāli‘i ma tu‘u ‘ese ‘iā te ia lona ‘ofu tele, ‘ona ufitia lea o ia e ia i le ‘ie talatala ma nofo i le lefulefu.

7. ‘Ua ia tala‘i atu ma fa‘ailoa atu i Nineva i le pule a le tupu ma ali‘i sa ‘iā te ia, ‘ua fa‘apea atu, “‘Aua ne‘i ‘ai sina mea e tagata po o manu, po o lafu povi, po o lafu mamoe; ‘aua lava ne‘i latou ‘a‘ai, ‘aua fo‘i, latou te inu vai.

8. A ‘ia ufitia lava tagata ma manu i ‘ie talatala, ma ‘ia latou matuā ‘alalaga atu i le Atua; ‘ia latou ta‘itasi fo‘i ma liliu mai i lana amioga leaga ma le fa‘asauā ‘ua i o latou lima.

9. O ai se na te iloa, atonu e liliu mai le Atua ma salamō ma liliu ‘ese i lona to‘asā mamafa, ‘ina ‘ia lē fano ai i tatou.”

Faitau le mataupu e atoatoa Iona 3