14. ‘Ua liliu mai fo‘i le nu‘u uma na ‘ave fa‘atagataotau‘a e Isamaeli a‘i Mesepa ma latou fo‘i mai, ma ō mai ‘iā Ioanana le atali‘i o Karea.
15. A ‘ua sola Isamaeli le atali‘i o Netanaia ma tagata e to‘avalu a‘i Ioanana, ‘ua alu atu fo‘i ia i le fānauga a Amoni.
16. ‘Ona ‘ave ai lea e Ioanana le atali‘i o Karea ma ali‘i uma sa ‘iā te ia na ‘ave ‘au, o ē na totoe uma o le nu‘u, o ē na ia fa‘afoisia mai ai ‘iā Isamaeli le atali‘i o Netanaia nai Mesepa, ‘ina ‘ua uma ‘ona fasia e ia o Ketalia le atali‘i o Aikamo, o toa malolosi ma fafine ma tamaiti ma eunuka, o ē na ia fa‘afoisia mai mai Kipeona.
17. ‘Ona latou ō ai lea ma latou nonofo i le fale o Kimeama, o lo‘o lata ane i Peteleema, o le a ō atu lava i Aikupito,
18. ‘ona o Kaletaia; auā sa fefefe i latou ‘iā te i latou, ‘ona ‘ua fasia e Isamaeli le atali‘i o Netanaia o Ketalia le atali‘i o Aikamo, o lē na tofia e le tupu o Papelonia e pule i le nu‘u.