1. ‘Ua o‘o i le fitu o masina, ‘ona ō mai ai lea o Isamaeli le atali‘i o Netanaia, le atali‘i o Elisama, o le ‘āiga tō tino o le tupu ma ali‘i sa i le tupu ma tagata e to‘asefulu fa‘atasi ma ia, ‘iā Ketalia le atali‘i o Aikamo i Mesepa; ‘ua latou ‘a‘ai fo‘i fa‘atasi i lea mea i Mesepa.
2. ‘Ona tula‘i ai lea o Isamaeli le atali‘i o Netanaia, ma ia tagata e to‘asefulu na ‘iā te ia ma latou fasi ‘iā Ketalia le atali‘i o Aikamo le atali‘i o Safana, i le pelu, na fasiotia e i latou o ia na tofia e le tupu o Papelonia e pule i le nu‘u.
3. ‘Ua fasia fo‘i e Isamaeli o Iuta uma sa ‘iā Ketalia i Mesepa ma Kaletaia, o tagata tau, ‘ua latou maua i lea mea.
4. ‘Ua o‘o i le lua o aso talu ‘ona fasiotia e ia o Ketalia ma ‘ua lē iloa e se tasi;
5. ‘ona ō mai ai lea o tagata mai Sekema ma Sailo, ma Samaria, o tagata e to‘avalugafulu, ‘ua tafi a latou ‘ava ma ‘ua saei o latou ‘ofu, ‘ua selei fo‘i i latou e i latou, sa i o latou lima o taulaga i mea e ‘ai ma pulu lipano, e avatua i le fale o le ALI‘I.
6. ‘Ona alu atu ai lea a‘i Mesepa o Isamaeli le atali‘i e Netanaia, e fa‘afetaia‘i ‘iā i latou, ‘ua savali ia ma tagi fano; ‘ua o‘o ‘ina fetaia‘i o ia ma i latou, ‘ona fai atu ai lea o ia ‘iā te i latou, “‘Inā ō mai ia ‘iā Ketalia le atali‘i o Aikamo.”
7. Na o‘o fo‘i i latou i totonu o le ‘a‘ai, ‘ona fasiotia ai lea o i latou e Isamaeli le atali‘i o Netanaia ma lafo ‘iā te i latou i totonu o le lua, o ia lava ma tagata na ‘iā te ia.
8. ‘Ae peita‘i sa ‘iā te i latou o tagata e to‘asefulu, na fai mai ‘iā Isamaeli, “‘Aua ‘e te fasiotia i matou; auā ‘ua ‘iā te i matou mea ‘ua natia i le vao, o saito ma karite ma suāu‘u ma meli; ‘ona tu‘u lea e ia.” ‘Ua na lē fasiotia i latou fa‘atasi ma o latou uso.
9. O le lua fo‘i na lafo i ai e Isamaeli tino o tagata oti uma na ia fasia ‘ona o Ketalia, o le lua lea na faia e Asa le tupu, ‘ona o Paasa le tupu o Isaraelu; na fa‘atumuina ai e Isamaeli le atali‘i o Netanaia i ē na fasia.
10. ‘Ona ‘ave ai lea fa‘atagataotau‘a e Isamaeli o ē na totoe uma o le nu‘u na i Mesepa, o afafine fo‘i o le tupu ma le nu‘u uma na totoe i Mesepa, na tu‘uina atu e Nepusatana le pule i le ‘au e fa‘afeao ‘iā Ketalia le atali‘i o Aikamo e pule ai; ‘ua ‘ave i latou fa‘atagataotau‘a e Isamaeli le atali‘i o Netanaia, ‘ua alu atu fo‘i ia e sopo‘ia atu i le fānauga a Amoni.
11. A ‘ua fa‘alogo e Ioanana le atali‘i o Karea ma ali‘i uma sa ‘iā te ia na ‘ave ‘au, i le leaga uma na faia e Isamaeli le atali‘i o Netanaia,