3. ‘ia e avatu ai fo‘i i le tupu o Etoma ma le tupu o Moapi ma le tupu o le fānauga a Amoni ma le tupu o Turo ma le tupu o Saitonu, i lima o sāvali, o ē ō mai i Ierusalema ‘iā Setekaia le tupu o Iuta;
4. ‘ia e fai atu fo‘i ‘iā te i latou, ‘ia latou fa‘apea atu i o latou ali‘i, O lo‘o fa‘apea ‘ona fetalai mai o le ALI‘I o ‘au, le Atua o Isaraelu, ‘Ia fa‘apea ‘ona ‘outou fai atu i o ‘outou ali‘i,
5. O a‘u nei, ‘ua ‘ou faia le lalolagi, o tagata ma manu ‘ua i luga o le fogā‘ele‘ele, i lo‘u mana tele, ma lo‘u lima fa‘aloaloa; ‘ua ‘ou tu‘uina atu ai fo‘i i lē ‘ua tatau ma lo‘u manatu.
6. O lenei, ‘ua ‘ou tu‘uina atu e a‘u o ia nu‘u uma i le lima o Nepukanesa le tupu o Papelonia, la‘u ‘au‘auna; o manu fe‘ai fo‘i ‘ua ‘ou tu‘uina atu ai ‘iā te ia, e ‘au‘auna ‘iā te ia.
7. E ‘au‘auna lava atu nu‘u uma ‘iā te ia ma lona atali‘i ma le atali‘i o lona atali‘i, se‘ia o‘o i ona lava po o lona nu‘u; ‘ona ‘au‘auna lea o ia i nu‘u e tele ma tupu sili.
8. A o le nu‘u ma le mālō e lē mafai ‘ona ‘au‘auna i lenā Nepukanesa le tupu o Papelonia, e lē tu‘uina atu fo‘i o latou ua i le amo a le tupu o Papelonia, ‘ou te taui atu i lenā nu‘u i le pelu ma le oge ma le fa‘ama‘i, o lo‘o fetalai mai ai le ALI‘I, se‘ia ‘ou fa‘aumatia i latou i lona lima.
9. O lenei, ‘aua ne‘i ‘outou fa‘alogo i o ‘outou perofeta ma o ‘outou taulāitu ma o ‘outou fai miti, ma o ‘outou tagata e ‘i‘ite i ao o le lagi ma ē fai togafiti fa‘ataulāitu ‘iā te ‘outou, o i latou o ē fai atu ‘iā te ‘outou, ‘ua fa‘apea atu, “E lē fai ma ‘au‘auna ‘outou i le tupu o Papelonia.”
10. Auā o mea pepelo ‘ua latou vavalo ai ‘iā te ‘outou, ‘ina ‘ia ‘avemamaoina ‘outou i lo ‘outou lau‘ele‘ele; ‘ia ‘ou tulia fo‘i ‘outou ma ia fa‘aumatia ‘outou.
11. A o le nu‘u, e tu‘uina o latou ua i le amo a le tupu o Papelonia ma ‘au‘auna ‘iā te ia, ‘ou te tu‘uina atu i latou ‘ia nofo pea i lo latou lau‘ele‘ele, o lo‘o fetalai mai ai le ALI‘I, latou te galulue ai ma latou nonofo ai.
12. Na a‘u fai atu fo‘i ‘iā Setekaia, le tupu o Iuta, e tusa ma ia ‘upu uma, ‘ua fa‘apea atu: ‘Ia ‘outou tu‘uina o ‘outou ua i le amo a le tupu o Papelonia ma ‘au‘auna ‘iā te ia ma lona nu‘u, ‘ia ola ai ‘outou.
13. Se a ‘ea le mea tou te fia oti ai, o oe ma lou nu‘u, i le pelu ma le oge ma le fa‘ama‘i, e pei ‘ona fetalai mai ai o le ALI‘I i le nu‘u e le ‘au‘auna i le tupu o Papelonia?