17. ‘Aua tou te fa‘alogo ‘iā te i latou; ‘ia ‘outou ‘au‘auna i le tupu o Papelonia, ‘ia ola ai ‘outou; se a le mea e fai ai lenei ‘a‘ai ma fa‘atafunaga?
18. ‘Āfai fo‘i o perofeta i latou, pe ‘āfai fo‘i ‘ua ‘iā te i latou le afioga a le ALI‘I, se‘i latou fa‘atoga atu i le ALI‘I o ‘au, ‘ina ‘ia lē o‘o atu i Papelonia o ipu o totoe i le fale o le ALI‘I ma le fale o le tupu o Iuta, ma Ierusalema.
19. Auā o lo‘o fa‘apea ‘ona fetalai mai o le ALI‘I o ‘au, i pou ma le vai ma tu‘uga tā‘elega ma toe ipu ‘ua tu‘u i lenei ‘a‘ai,
20. o mea ia na lē ‘avea ai e Nepukanesa le tupu o Papelonia i lona ‘ave fa‘atagataotau‘a ia Iekonia le atali‘i o Ioakima, le tupu o Iuta ma ali‘i uma o Iuta ma Ierusalema mai Ierusalema i Papelonia.
21. Auā o lo‘o fa‘apea ‘ona fetalai mai o le ALI‘I o ‘au, le Atua o Isaraelu, i ipu ‘ua totoe i le fale o le ALI‘I ma le fale o le tupu o Iuta ma Ierusalema,
22. e ‘aveina atu ia mea i Papelonia, e i ai fo‘i i lea mea se‘ia o‘o i le aso ‘ou te asiasi atu i ai, o lo‘o fetalai mai ai le ALI‘I; ‘ona ‘ou toe ‘aumaia lea ma fa‘afoisia mai ia mea i lenei mea.#