6. ‘ona ‘ou faia lea o lenei fale ‘ia pei o Sailo, ‘ou te faia fo‘i lenei ‘a‘ai ma fa‘afanoga i atu nu‘u uma o le lalolagi.
7. ‘Ua fa‘alogo le ‘au ositaulaga ma perofeta ma le nu‘u uma, ‘iā Ieremia, o lo‘o fai atu ia ‘upu i le fale o le ALI‘I.
8. ‘Ua uma ‘ona fai atu e Ieremia o mea uma na poloa‘i mai ai le ALI‘I na te fai atu i le nu‘u uma, ‘ona pu‘e atu ai lea ‘iā te ia e le ‘au ositaulaga ma perofeta ma le nu‘u uma, ‘ua fa‘apea atu, “E oti lava oe.
9. Se a ‘ea le mea ‘ua e vavalo mai ai i le suafa o le ALI‘I, ‘ua fa‘apea mai, ‘E ‘avea lenei fale e pei o Sailo, o lenei ‘a‘ai fo‘i e fa‘atafunaina ia, e leai se nofo ai?’” ‘Ua fa‘apotopotoina le nu‘u uma ‘iā Ieremia i le fale o le ALI‘I.
10. ‘Ua fa‘alogo ali‘i o Iuta i ia mea, ‘ona latou ō a‘e ai lea mai le fale o le tupu, i le fale o le ALI‘I ma latou nonofo i le mea e ui ai i le faitoto‘a fou o le fale o le ALI‘I;
11. ‘ona fai atu ai lea o ositaulaga ma perofeta i ali‘i ma le nu‘u uma, ‘ua fa‘apea atu, “E tatau ‘ona oti o lenei tagata, auā ‘ua na vavalo i mea leaga e o‘o i lenei ‘a‘ai, e pei ‘ona fa‘afofoga i ai o ‘outou.”
12. ‘Ona fai atu ai lea o Ieremia i ali‘i uma ma le nu‘u uma, ‘ua fa‘apea atu, “‘Ua ‘auina mai a‘u e le ALI‘I e vavalo i lenei fale ma lenei ‘a‘ai i ‘upu uma ‘ua ‘outou fa‘alogo i ai.
13. O lenei, ‘ia ‘outou sauni lelei o ‘outou ala ma a ‘outou amioga ma ‘ia ‘outou fa‘alogo i le si‘ufofoga o le ALI‘I lo ‘outou Atua; ‘ona salamō ai lea o le ALI‘I i le malaia na ia fetalai mai e o‘o ‘iā te ‘outou.
14. A o a‘u nei, fa‘auta, ‘ua i o ‘outou lima a‘u; ‘ia ‘outou faia ‘iā te a‘u e pei ‘ona lelei ma tonu ‘iā te ‘outou,
15. tau ‘ina ‘ia ‘outou matuā iloa, ‘āfai tou te fasioti ‘iā te a‘u, ‘ona ‘outou fa‘ae‘e ai lea o le toto o le tagata ‘ua lē sala i luga ‘iā te ‘outou, ‘atoa ma lenei ‘a‘ai ma ē o nonofo ai; auā e moni lava, ‘ua ‘auina mai a‘u e le ALI‘I ‘iā te ‘outou e fai atu ia ‘upu uma i o ‘outou luma.”
16. ‘Ona fai atu ai lea o ali‘i ma le nu‘u uma i ositaulaga ma perofeta, “E lē tatau ‘ona oti o lenei tagata, auā ‘ua tautala mai o ia ‘iā te i tatou i le suafa o le ALI‘I lo tatou Atua.”
17. ‘Ona tula‘i mai ai lea o isi tagata, o toeaina o le nu‘u ma latou fai atu i le fa‘apotopotoga uma o le nu‘u, ‘ua fa‘apea atu,
18. “Na vavalo mai Mika le Morese, i ona po o Esekia le tupu o Iuta, ‘ua na fai mai fo‘i i le nu‘u uma o Iuta, ‘ua fa‘apea mai, ‘O lo‘o fa‘apea ‘ona fetalai mai o le ALI‘I o ‘au,E fai Siona ma fanua e suatia,e fai fo‘i Ierusalema ma faupu‘egama‘a,o le mauga fo‘i o i ai le fale,e fai lea ma mea maualuluga i le vao matua.’
19. Pe na fasiotia lava ‘ea o ia e Esekia le tupu o Iuta ma Iuta uma? Na le mata‘u ‘ea o ia i le ALI‘I ma ‘ai‘oi atu i luma o le ALI‘I; ‘ona salamō ai lea o le ALI‘I i le malaia na ia fetalai mai ‘iā te i latou? A fa‘apea ‘ona agasala tele ai lea o i tatou i o tatou agaga.”
20. Sa i ai fo‘i le tasi tagata na vavalo mai i le suafa o le ALI‘I, o Uria, le atali‘i o Semaia mai Kiriata-iarima, na vavalo mai o ia i mea leaga e o‘o i lenei ‘a‘ai ma lenei nu‘u e pei o ‘upu uma a Ieremia;