1. O le amataga o le nofoa‘iga a Ioakima le atali‘i o Iosia, le tupu o Iuta, na o‘o mai ai lenei afioga mai le ALI‘I, ‘ua fa‘apea mai,
2. O lo‘o fa‘apea ‘ona fetalai mai o le ALI‘I: ‘Ia e tu atu i le lotoā o le fale o le ALI‘I ma fai atu i ‘a‘ai uma o Iuta, o ē ō mai e tapua‘i i le fale o le ALI‘I, ‘upu uma ‘ou te poloa‘i atu ai ‘iā te oe e fai atu ‘iā te i latou, ‘aua lava le tu‘ua se ‘upu;
3. atonu pe latou te fa‘alogo ai ma latou ta‘itasi ma liliu ‘ese i lona ala leaga, ‘ina ‘ia ‘ou salamō i le malaia ‘ua ‘ou manatu e fa‘ao‘o ‘iā te i latou, ‘ona o le leaga o a latou amioga.
4. ‘E te fai atu fo‘i ‘iā te i latou, O lo‘o fa‘apea ‘ona fetalai mai o le ALI‘I: ‘Āfai tou te lē fa‘alogo mai ‘iā te a‘u ma le sāvavali e tusa ma la‘u tulafono ‘ua ‘ou tu‘uina i o ‘outou luma,
5. e lē fa‘alogo i ‘upu a a‘u ‘au‘auna le ‘au perofeta, na ‘a‘auina e a‘u ‘iā te ‘outou; na ‘ou ala ‘a‘auina i latou, a ‘ua ‘outou lē fa‘alogo mai;
6. ‘ona ‘ou faia lea o lenei fale ‘ia pei o Sailo, ‘ou te faia fo‘i lenei ‘a‘ai ma fa‘afanoga i atu nu‘u uma o le lalolagi.
7. ‘Ua fa‘alogo le ‘au ositaulaga ma perofeta ma le nu‘u uma, ‘iā Ieremia, o lo‘o fai atu ia ‘upu i le fale o le ALI‘I.
8. ‘Ua uma ‘ona fai atu e Ieremia o mea uma na poloa‘i mai ai le ALI‘I na te fai atu i le nu‘u uma, ‘ona pu‘e atu ai lea ‘iā te ia e le ‘au ositaulaga ma perofeta ma le nu‘u uma, ‘ua fa‘apea atu, “E oti lava oe.
9. Se a ‘ea le mea ‘ua e vavalo mai ai i le suafa o le ALI‘I, ‘ua fa‘apea mai, ‘E ‘avea lenei fale e pei o Sailo, o lenei ‘a‘ai fo‘i e fa‘atafunaina ia, e leai se nofo ai?’” ‘Ua fa‘apotopotoina le nu‘u uma ‘iā Ieremia i le fale o le ALI‘I.
10. ‘Ua fa‘alogo ali‘i o Iuta i ia mea, ‘ona latou ō a‘e ai lea mai le fale o le tupu, i le fale o le ALI‘I ma latou nonofo i le mea e ui ai i le faitoto‘a fou o le fale o le ALI‘I;
11. ‘ona fai atu ai lea o ositaulaga ma perofeta i ali‘i ma le nu‘u uma, ‘ua fa‘apea atu, “E tatau ‘ona oti o lenei tagata, auā ‘ua na vavalo i mea leaga e o‘o i lenei ‘a‘ai, e pei ‘ona fa‘afofoga i ai o ‘outou.”
12. ‘Ona fai atu ai lea o Ieremia i ali‘i uma ma le nu‘u uma, ‘ua fa‘apea atu, “‘Ua ‘auina mai a‘u e le ALI‘I e vavalo i lenei fale ma lenei ‘a‘ai i ‘upu uma ‘ua ‘outou fa‘alogo i ai.
13. O lenei, ‘ia ‘outou sauni lelei o ‘outou ala ma a ‘outou amioga ma ‘ia ‘outou fa‘alogo i le si‘ufofoga o le ALI‘I lo ‘outou Atua; ‘ona salamō ai lea o le ALI‘I i le malaia na ia fetalai mai e o‘o ‘iā te ‘outou.
14. A o a‘u nei, fa‘auta, ‘ua i o ‘outou lima a‘u; ‘ia ‘outou faia ‘iā te a‘u e pei ‘ona lelei ma tonu ‘iā te ‘outou,