1. O le afioga na o‘o mai ‘iā Ieremia mai le ALI‘I, ‘ua fa‘apea mai:
2. “‘Inā tula‘i ia ma alu ifo i le fale o le fai ipu ‘omea, ‘ona ‘ou fa‘ailoa atu ai lea ‘iā te oe i lea mea o a‘u ‘upu.”
3. ‘Ona ‘ou alu ifo ai lea i le fale o le fai ipu ‘omea, fa‘auta fo‘i, o fai e ia lana galuega i luga o mea ta‘avilivili.
4. ‘Ua leaga le ipu na ia faia i le ‘omea i le lima o le fai ipu ‘omea; ‘ona toe fai ai lea e ia o le tasi ipu e tusa ma le manatu o le fai ipu ‘omea ‘ona fai.
5. ‘Ona o‘o mai lea o le afioga a le ALI‘I ‘iā te a‘u, ‘ua fa‘apea mai:
6. Le ‘āiga o Isaraelu e, ‘ou te lē mafaia ‘ea ‘ona fai ‘iā te ‘outou e pei o lenā fai ipu ‘omea? o lo‘o fetalai mai ai le ALI‘I. Fa‘auta, le ‘āiga o Isaraelu e, e pei o ‘omea i le lima o le fai ipu ‘omea, e fa‘apea fo‘i ‘outou i lo‘u lima.
7. O le itū aso ‘ou te tautala atu ai i se nu‘u, po o se mālō, ‘ia lia‘iina ma lepetia ma fa‘aumatia;
8. pe ‘āfai e liliu mai lea nu‘u na ‘ou tautala i ai, nai la latou amio leaga, ‘ona ‘ou salamō ai lea i le malaia na ‘ou manatu e fa‘ao‘o i ai.
9. O le itū aso fo‘i ‘ou te tautala atu ai i se nu‘u, po o se mālō, e atiina a‘e ma fa‘atotōina;
10. a faia e i latou le amio leaga i o‘u luma ma latou lē fa‘alogo i lo‘u leo, ‘ona ‘ou salamō ai lea i le manuia na a‘u fai atu ai ‘ou te fa‘amanuiaina ai i latou.
11. O lenei, ‘ia e fai atu i tagata o Iuta ma ē o nonofo i Ierusalema, ‘ia fa‘apea atu, ‘Ua fa‘apea ‘ona fetalai mai o le ALI‘I, Fa‘auta, o a‘u nei, ‘ou te sauni atu le malaia ‘iā te ‘outou, ‘ou te mafaufau fo‘i i se togafiti ‘ia leaga ai ‘outou; o lenei, ‘ia ‘outou toe fo‘i mai, ta‘itasi le tagata a‘i lona ala leaga ma ‘ia ‘outou sauni lelei o ‘outou ala ma a ‘outou amioga.
12. A ‘ua latou fai mai, “E lē aogā; auā matou te mulimuli atu i o matou mafaufauga, e ta‘itasi fo‘i ma fai e tusa ma le finau vale o lona loto leaga.”
13. O le mea lea o lo‘o fa‘apea ‘ona fetalai mai ai o le ALI‘I:‘Ia ‘outou fesili atu i nu‘u ‘ese,po o ai ‘ua fa‘alogo i mea fa‘apenei?‘ua faia e le taupou o Isaraelu le mea e matuā ‘inosia.