14. Le ALI‘I e, ‘ia e fa‘amālōlō mai ‘iā te a‘u,‘ona mālōlō ai lea o a‘u.‘Ia e fa‘aola mai ‘iā te a‘u,‘ona fa‘aolaina ai lea o a‘u;auā o oe ‘ou te vivi‘i i ai.
15. Fa‘auta, ‘ua latou fai mai ‘iā te a‘u,“O fea o i ai le afioga a le ALI‘I?Se‘i o‘o mai lava.”
16. A o a‘u nei,‘ua ‘ou lē popole ‘ina ‘ia lē fai a‘u ma leoleo mamoe e mulimuli atu ‘iā te oe.‘Ua ‘ou le mana‘o fo‘i i le aso vale,‘ua silafia e oe; o le mea ‘ua alu atu i o‘u laugutu;‘ua i ou luma lea.
17. ‘Aua ne‘i fai oe ma fa‘amata‘u ‘iā te a‘u;o oe lo‘u malu i le aso vale.
18. ‘Ia fa‘amāina i latou o ē tuliloa mai ‘iā te a‘u,‘ae ‘aua le fa‘amāina a‘u.‘Ia matata‘u i latou, ‘ae ‘aua le mata‘u o a‘u;‘ia fa‘a‘o‘otia ‘iā te i latou le aso valema ‘ia fa‘aumatia i latou i le malaia e sautualua.
19. ‘Ua fa‘apea ‘ona fetalai mai o le ALI‘I ‘iā te a‘u: Alu ia, ‘inā tu i le faitoto‘a o tagata o le nu‘u, e ulu mai ai tupu o Iuta ma ō atu ai i latou; ‘ia e tu fo‘i i faitoto‘a uma o Ierusalema;
20. ma ‘ia e fa‘apea atu ‘iā te i latou: ‘Ia ‘outou fa‘alogologo mai i le afioga a le ALI‘I, o ‘outou tupu o Iuta ma Iuta uma ‘atoa ma ‘outou uma o ē o nonofo i Ierusalema, o ē ulu mai i nei faitoto‘a;
21. o lo‘o fa‘apea ‘ona fetalai mai o le ALI‘I, ‘Ia ‘outou ‘iā te ‘outou, ‘ina ne‘i ‘ave se avega i le aso sapati, ‘aua fo‘i le ‘aumai ai i faitoto‘a o Ierusalema;
22. ‘aua fo‘i ne‘i avatua se avega nai o ‘outou fale i le aso sapati, ‘aua fo‘i tou te fai ai se galuega e tasi, a ‘ia fa‘apa‘iaina e ‘outou le aso sapati, e pei ‘ona ‘ou fai atu ai i o ‘outou tamā.
23. A ‘ua latou lē fa‘alogo mai ma ‘ua lē ua‘i mai o latou taliga, a ‘ua latou fa‘ama‘a‘a o latou ua, ‘ina ‘ia latou lē fa‘alogo mai ma ‘ia lē talia mai le a‘oa‘iga.
24. ‘Āfai fo‘i tou te matuā fa‘alogo mai ‘iā te a‘u, o lo‘o fetalai mai ai le ALI‘I ma ‘outou lē ‘aumaia se avega i faitoto‘a o lenei ‘a‘ai i le aso sapati, ‘ae fa‘apa‘iaina e ‘outou le aso sapati ma ‘outou le fai ai se galuega e tasi;
25. ‘ona ō mai ai lea i faitoto‘a o lenei ‘a‘ai o tupu ma ali‘i o nonofo i le nofoāli‘i o Tavita, o ti‘eti‘e i nofoa fa‘ata‘avalevale ma solofanua, o i latou ma o latou ali‘i, o tagata o Iuta ma ē o nonofo i Ierusalema; e ‘ainā fo‘i lenei ‘a‘ai e fa‘avavau.
26. E ō mai i latou mai ‘a‘ai o Iuta ma mea ‘ua vagavagai i Ierusalema ma le nu‘u o Peniamina ma le nu‘u maulalo ma mauga ma le itū i saute, latou te ‘aumaia taulaga mū ma taulaga ma taulaga i mea e ‘ai, ma pulu lipano, o i latou fo‘i e ‘aumai taulaga fa‘ane‘ene‘e i le fale o le ALI‘I.
27. ‘Ae ‘āfai tou te lē fa‘alogo mai ‘iā te a‘u ma ‘outou le fa‘apa‘iaina le aso sapati, a ‘ua ‘ave ai se avega ma ‘ua ulu mai i faitoto‘a o Ierusalema i le aso sapati; ‘ona ‘ou tutuina ai lea o le afi i ona faitoto‘a e susunuina ai maota o Ierusalema, e lē tineia lava.#