10. Na ‘ou maua Isaraelu, e pei o fuifui vine i le vao; na ‘ou iloa o ‘outou mātua e pei o ulua‘i mati i le mati ‘ina ‘ua fa‘ato‘ā fua mai; a ‘ua ō i latou ‘iā Paalapeoro, ‘ua vavae atu i latou i le mea e māsiasi ai; ‘ua ‘inosia i latou e tusa ma le mea ‘ua latou naunau i ai.
11. O Efaraima e lele ‘ese lo latou mamalu fa‘apei o le manulele, a‘i le fānauga ma le manava ma le fa‘ato‘ā afuafua.
12. E ui ‘ina latou tausi a latou fānau, ‘ou te ‘ave‘eseina i latou i tagata; ‘oi talofa lava ‘iā te i latou, pe a a‘u alu ‘ese ‘iā te i latou.
13. ‘Ua totōina Efaraima i le mea matagofie, fa‘apei ‘ona ‘ou iloa o Turo; a o Efaraima na te ta‘ita‘iina atu lana fānau i le fasioti tagata.
14. Le ALI‘I e, ‘ia e avatu ‘iā te i latou; se a fo‘i se mea ‘e te avatua? ‘Ia e avatu ‘iā te i latou le manava fānau lē au ma susu e lē susua.
15. O lo‘o i Kilikala lo latou leaga uma; auā na ‘ou ‘ino‘ino ‘iā te i latou i lea mea, ‘ou te tulia i latou a‘i lo‘u fale ‘ina ‘ua leaga mea ‘ua latou faia; ‘ou te lē toe alofa ‘iā te i latou; o latou ali‘i uma, o ē fouvale i latou.
16. ‘Ua taia Efaraima, ‘ua mago lo latou pogai; latou te lē fua mai ni fua; ‘āfai fo‘i latou te fānanau, ‘ou te fasiotia la latou fānau pele.
17. E lafoa‘iina i latou e lo‘u Atua, auā ‘ua latou lē fa‘alogo ‘iā te ia; e ta‘asē i latou nu‘u ‘ese.#