1. Isaraelu e, ‘aua ‘e te fiafia ma le ‘oli‘oli, fa‘apei o isi nu‘u; auā ‘ua e alu ‘ese i lou Atua e faita‘aga ai; ‘ua e fia fai i taui i mea uma e sasa ai saito.
2. E le fagaina i latou i le mea e sasa ai saito ma le soligāvine, e oge ai uaina fou.
3. Latou te lē nonofo i le nu‘u o le ALI‘I, ‘ae toe fo‘i Efaraima i Aikupito, latou te ‘a‘ai mea leaga i Asuria.
4. Latou te lē fai taulaga i le ALI‘I i uaina, e lē fiafia o ia ‘iā te i latou; o a latou taulaga, e ‘iā te i latou ia, peiseaī o mea e ‘ai ‘ae fa‘anoanoa, o i latou uma e ‘a‘ai ai e leaga ai i latou; auā o la latou mea e ‘ai mā latou e lē o‘o atu lea i le fale o le ALI‘I.
5. Se a se mea tou te faia i le aso e fai ai le tausamiga ma le aso e fai ai le taulaga i le ALI‘I?
6. Auā, fa‘auta mai, ‘ua ō i latou ne‘i malaia; e fa‘apotopotoina i latou e Aikupito, e tanumia i latou e Mafi; o mea matagofie o i ai o latou ario e vaoa ia i la‘au ogoogo; e i ai i o latou fale o la‘au talatala.
7. ‘Ua o‘o ai ona po e taui ai, ‘ua o‘o mai ona po e totogi ai; e iloa e Isaraelu; “‘Ua valea le perofeta, ‘ua valea lava le va‘afa‘atau,” ‘ona o le tele o lau amio leaga ma le ‘ino‘ino tele.
8. O lo‘o fa‘atalitali Efaraima fa‘atasi i lo‘u Atua; ‘ua se mailei o ē fai manu le perofeta i ana amio uma; o le ‘ino‘ino i le fale o lona Atua.
9. ‘Ua matuā amio leaga i latou, fa‘apei ‘ona fai i ona po o Kipea; e manatua e ia a latou agasala, e taui atu ‘iā latou amio leaga.
10. Na ‘ou maua Isaraelu, e pei o fuifui vine i le vao; na ‘ou iloa o ‘outou mātua e pei o ulua‘i mati i le mati ‘ina ‘ua fa‘ato‘ā fua mai; a ‘ua ō i latou ‘iā Paalapeoro, ‘ua vavae atu i latou i le mea e māsiasi ai; ‘ua ‘inosia i latou e tusa ma le mea ‘ua latou naunau i ai.