1. ‘Ia ‘outou fa‘apea atu i o ‘outou uso, Ama e, ‘ia fa‘apea atu fo‘i i o ‘outou tuafafine Ruama e.
2. ‘Ia ‘outou finau atu i lo ‘outou tinā, ‘inā finafinau atu ia; auā e lē o la‘u avā ia, e lē o lana tane fo‘i a‘u, ‘inā lafoa‘i ia e ia ana faita‘aga a‘i ‘iā te ia, ma ana mulilua fo‘i i le vā o ona susu;
3. ne‘i ‘ou talai‘eseina ona ‘ofu, ma tu‘u atu ‘iā te ia e pei ‘ona i ai i le aso na fānau mai ai o ia, e ‘avea fo‘i o ia e pei o se vao ma ‘avea e pei o se nu‘u naumati ma ‘ou fa‘aumatia o ia i le fia inu.
4. ‘Ou te lē alofa atu i lana fānau auā o le fānau a le faita‘aga i latou.
5. Auā ‘ua faita‘aga lo latou tinā, ‘ua agavale lava le na fānaua i latou, auā na ia fa‘apea mai, “‘Ou te mulilua atu i ē manana‘o mai ‘iā te a‘u, o ē o ‘aumai a‘u mea e ‘ai ma a‘u vai ma a‘u fulufulu mamoe, ma a‘u lino, ma a‘u suāu‘u ma a‘u mea e inu.”
6. O le mea lea ‘ou te pupuni ai lou ala i la‘au tuitui, ‘ou te si‘osi‘oina fo‘i o ia i le pā, ‘ia lē iloa e ia ona ala.
7. E mulimuli atu lava o ia i ē o manana‘o ‘iā te ia, ‘ae lē maua atu i latou e ia, e sā‘ili‘ili o ia ‘iā te i latou, ‘ae lē iloa; ‘ona fa‘apea mai ai lea o ia, “‘Ou te alu, ‘ou te fo‘i i la‘u tane muamua, auā sa sili lo‘u manuia anamua, i lo‘u manuia i nei ona po.”
8. Auā na lē iloa e ia o a‘u lava sa foa‘iina atu ‘iā te ia o saito ma uaina ma suāu‘u; na a‘u fa‘ateleina fo‘i ana ario ma ana auro, na latou saunia mo Paala.
9. O le mea lea ‘ou te toe fo‘i ai, ma ‘ave‘ese la‘u saito i ona lava aso, ma la‘u uaina i ona lava po; ‘ou te ‘ave‘esea fo‘i a‘u fulufulu mamoe, ma a‘u lino, sa tu‘uina atu e ufiufi a‘i lona lē lavalavā.
10. O lenei ‘ou te fa‘aali lenā amio ulavale i luma o ē o manana‘o ‘iā te ia, e leai fo‘i se tasi na te lavea‘iina o ia a‘i lo‘u lima.
11. ‘Ou te fa‘aumatia fo‘i lona fiafia uma lava, o ana tausamiga ma ona masina fa‘ato‘ā va‘aia, ma ona sapati ‘atoa ma ona nu‘u uma.
12. ‘Ou te fa‘aumatia ona vine ma ona mati, na ia fa‘apea mai ai “O ‘ou taui lava ia na ‘aumai ‘iā te a‘u e i latou ‘ua manana‘o ‘iā te a‘u; e ‘avea fo‘i i latou ‘iā te a‘u ma vao matua, e ‘aina i latou e manu fe‘ai.”
13. ‘Ua fetalai mai le ALI‘I, ‘Ou te taui atu ‘iā te ia i ona po o Paala, na ia fa‘amū ai le mea manogi ‘iā te i latou; na ia tifitifi fo‘i ‘iā te ia i ona mama ma ona teuga, na ia mulimuli atu fo‘i i ē na manana‘o ‘iā te ia, a ‘ua fa‘agalogalo lava ‘iā te a‘u.
14. ‘Ae peita‘i a‘u fa‘auta, ‘ou te fa‘aoleole ‘iā te ia, ma ta‘ita‘i ‘iā te ia i le vao, ‘ou te fa‘amafanafana ‘iā te ia.
15. ‘Ou te tu‘uina atu fo‘i ‘iā te ia ana tōvine i lea mea, ma le vanu o Akori e fai ma faitoto‘a e fa‘amoemoe ai; e pese fo‘i o ia i ai e fa‘apei ‘ona fai i ona po ‘ina o teine muli o ia, pei o aso fo‘i na sau ai o ia i le nu‘u o Aikupito.
16. O lo‘o fa‘apea mai le ALI‘I, O le aso lava lea e o‘o ai ‘ona e fa‘aigoa ‘iā te ia o “Ise;” ‘e te lē fa‘aigoa ‘iā te a‘u o “Paale.”