4. A o a‘u o le ALI‘I, o lou Atua talu mai le nu‘u o Aikupito, ‘e te lē iloa se tasi Atua na o a‘u; e leai fo‘i se isi fa‘aola, na o a‘u.
5. Na ‘ou iloa oe i le vao, o le nu‘u naumati.
6. E pei ‘ona fagaina o i latou, sa fa‘apea ‘ona mā‘o‘ona o i latou; sa mā‘o‘ona i latou, ona fa‘amaualulugaina lea o latou loto; o le mea lea na latou fa‘agalogalo ai ‘iā te a‘u.
7. O lea ‘ua ‘avea ai a‘u ‘iā te i latou e pei o se leona; ‘ou te lamalama e pei o se nameri i le auala.
8. ‘Ou te oso atu ‘iā te i latou e pei o se urosa ‘ua ‘avea ana tama, ‘ou te saeia mea e ufita‘i o latou fatu; ‘ou te ‘aina i latou i lea mea e pei o se leona; e saeia i latou e le manu fe‘ai.
9. Isaraelu e, ‘ua malaia oe ‘iā te oe; a ‘ua ‘iā te a‘u lou fesoasoani.
10. O ifea o i ai nei lou tupu le na te fa‘aolaina oe i o ‘outou ‘a‘ai uma? O ifea ou fa‘amasino fo‘i na e fai mai ai, “‘Aumai ‘iā te a‘u se tupu ‘atoa ma ni ali‘i?”
11. Na ‘ou avatu ‘iā te oe le tunu i lo‘u tigā; na ‘ou ‘ave‘eseina fo‘i o ia i lo‘u ita.
12. ‘Ua fusifusi fa‘atasi le leaga o Efaraima; na teua lana agasala.
13. E o‘o ‘iā te ia le fa‘atigā o le fafine o le a fānau mai; o ia o le tama fa‘alēmafaufau, auā e lē tatau ona tuai mai o ia nai le mea e ō ifo ai tama.
14. ‘Ou te lavea‘i ‘iā te i latou ai le malosi o le tu‘ugamau; ‘ou te fa‘aola ‘iā te i latou ai le oti. Le oti e, o fea o i ai le malaia mai ‘iā te oe? Le tu‘ugamau e, o fea o i ai se mea e fano ai mai ‘iā te oe? e lilo ‘iā te a‘u le salamō.
15. E ui ‘ina fa‘auluolaina o ia i luma o ona uso, e agi mai le matagi mai sasa‘e, o le matagi o le ALI‘I e oso atu ia a‘i le vao, e pe lona vai‘eli, e mate fo‘i lona punāvai; na te fa‘aumatia le ‘oa o mea uma e mana‘omia.