1. O ai e pei o le tagata poto?O ai fo‘i sē na te iloa le fa‘amatalaga o se mea?O le poto o le tagata e malamalama ai ona mata;‘ua liliu ai fo‘i ona mata sauā.
2. ‘Ou te fai atu, ‘ia e ‘ana‘ana i le poloa‘iga a le tupu, ‘ona o le tautō fo‘i i Atua.
3. ‘Aua ‘e te fa‘avave ‘ona e alu ‘ese i ona luma; ‘aua ‘e te finau i se mea leaga; auā o mea uma e finagalo i ai o ia e faia e ia.
4. O le mea ‘ua i ai le poloa‘iga a le tupu, o le mea lea ‘ua i ai le pule; o ai fo‘i sē na te fai atu ‘iā te ia, “Se a le mea ‘ua e faia?”
5. O lē na te ‘ana‘ana i le poloa‘iga e lē iloa e ia se mea leaga, ‘ua iloa fo‘i i le loto o le tagata poto le tausaga ma le tonu.
6. Auā ‘ua i ai i mea ta‘itasi o ona po ma le tonu; ‘ae tele pea lava le leaga ‘ua i le tagata;
7. auā e lē iloa e ia mea e tutupu auā o ai sē na te fa‘ailoa atu i te ia ona po e tutupu ai?
8. E leai se tagata ‘ua i ai le pule i le agaga e tāofi ai le agaga; e leai fo‘i se pule ‘iā te ia i le aso e oti ai; e leai lava se ‘au‘eseina atu i lea tau‘a; o le amio leaga fo‘i e lē lavea‘iina ai o ē ‘ua faia.
9. ‘Ua ‘ou iloa nei mea uma, ‘ua ‘ou manatu fo‘i i lo‘u loto i galuega uma ‘ua faia i lalo o le lā; e i ai ona po e pule ai le tasi tagata i le tasi, e leaga ai o ia lava.
10. ‘Ona ‘ou iloa ai lea o ē ‘ua amio leaga ‘ua tanumia; na ō mai fo‘i i latou ma ō ‘ese atu i le mea pa‘ia; na fa‘agalogaloina fo‘i i latou i le ‘a‘ai na latou fa‘apea ai; o le mea fa‘atauva‘a fo‘i lea.
11. Auā ‘ua lē vave fa‘a‘o‘otia le sala i le amio leaga, o le mea lea ‘ua matuā naunau ai loto o tagata e fai mea leaga.
12. E ui lava ‘ina fa‘aselau ‘ona fai o mea leaga o lē ‘ua agasala ma ‘ua fa‘afualoaina lona ola; a ‘ua ‘ou iloa lava e manuia o ē ‘ua matata‘u i le Atua, o ē matata‘u i ona luma.
13. ‘Ae le manuia lē ‘ua amio leaga, e lē fa‘afualoaina fo‘i ona aso ‘ua pei o se ata; auā ‘ua lē mata‘u o ia i luma o le Atua.
14. ‘Ua i ai lenei mea fa‘atauva‘a ‘ua faia i le lalolagi; ‘ua i ai ē ‘ua amiotonu, ‘ua o‘o i ai mea e tatau i le galuega ‘ae amio leaga. ‘Ua i ai fo‘i o ē ‘ua amio leaga, ‘ua o‘o i ai mea e tatau i le galuega a ē amiotonu; ‘ua ‘ou fa‘apea ifo, o le mea fa‘atauva‘a fo‘i lea.
15. ‘Ona ‘ou vi‘ia ai lea o le ‘oli‘oli; auā ‘ua leai se mea lelei i le tagata i lalo o le lā, na ‘ona ia ‘ai ma inu ma ‘oli‘oli; auā e tumau lea ‘iā te ia mai lana galuega, i aso o lona ola, ‘ua foa‘iina mai e le Atua ‘iā te ia i lalo o le lā.
16. ‘Ua fa‘asaga lo‘u loto ‘ia iloa le poto, ‘ia iloa fo‘i le galuega ‘ua faia i le lalolagi; auā fo‘i o lo‘o i ai lē ‘ua lē iloa sina moe i ona mata i le ao ‘atoa ma le po;
17. ‘ona ‘ou iloa ai lea o galuega uma a le Atua, e lē mafaia e le tagata ‘ona iloa o le galuega ‘ua faia i lalo o le lā; auā e ui lava ‘ina tigā se tagata i sā‘ili, ‘ae lē iloa e ia; i le ma lea, a fa‘apea ifo se tagata poto, o le a na iloa, e lē mafai ‘ona iloa e ia.#