10. ‘Aua ‘e te fa‘apea, “Se a le mea ‘ua sili ai ‘ona lelei o ona po anamua i nei ona po?”Auā e lē o le poto ‘ua e fesili ai i lea mea.
11. E lelei le poto e fa‘atasi ma le tofi,e sili ‘ona aogā fo‘i i ē o iloa atu le lā;
12. auā ‘ua fai le poto ma mamalu, ‘ua fai fo‘i tupe ma mamalu;a o le aogā lenei o le poto ‘ua maua, e ola ai ē ‘ua i ai.
13. ‘Inā mānatunatu ia i le galuega a le Atua;auā o ai sē na te mafaia ona fa‘asa‘oina o le mea ‘ua fa‘api‘opi‘oina e ia?
14. ‘Inā fiafia ia i le aso e manuia ai, ‘ia mafaufau fo‘i i le aso e malaia ai;‘ua tu‘u feagai e le Atua le tasi i le tasi, ‘ina ‘ia lē iloa e le tagata se mea e tupu pe a mavae atu o ia.
15. ‘Ua ‘ou iloa nei mea uma i ‘ou nei aso fa‘atauva‘a; o le tagata amiotonu e oti o ia i lana amiotonu; o le tagata amio leaga fo‘i e ola umi o ia i lana amioleaga.
16. ‘Aua ‘e te amiotonu na‘uā, ‘aua fo‘i ‘e te fa‘atele na‘uā lou poto; se a le mea e oti ai oe ‘iā te oe?
17. ‘Aua ‘e te amio leaga na‘uā, ‘aua fo‘i ‘e te fa‘avalea; se a le mea e oti ai oe a o le‘i o‘o i ou po?
18. E lelei ‘ona e tāofi i lenei, ‘aua fo‘i ‘e te tu‘u ‘ese lou lima i lenā; auā o lē ‘ua mata‘u i le Atua e sao o ia a‘i na mea uma.
19. O le poto e sili ai ‘ona malosi o lē ‘ua poto, i faipule e to‘asefulu ‘ua i le ‘a‘ai.
20. E leai lava se tagata amiotonu i le lalolagi, o lē na te faia amio lelei, ma le lē agasala.
21. ‘Aua fo‘i ‘e te manatu i ‘upu uma ‘ua faia; ne‘i e fa‘alogo i lau ‘au‘auna o fetu‘u ‘iā te oe;
22. auā fo‘i ‘ua iloa lou loto, o oe lava ‘ua atu lasi ‘ona e fetu‘u i nisi tagata.
23. ‘Ua ‘ou tofotofo ma le poto i nei mea uma; na ‘ou fa‘apea ifo, “O le a ‘ou poto;” a ‘ua mamao lava lea ‘iā te a‘u.
24. O le mea ‘ua mamao ma le matuā loloto, o ai sē na te mafaia ‘ona iloa?
25. Na ‘ou fa‘asaga ma lo‘u loto ‘ia iloa ma sā‘ili ma su‘esu‘e i le poto ma le uiga o mea, ‘ia iloa fo‘i le leaga o le valea ma le amio valea a ē vālelea.
26. ‘Ua ‘ou iloa fo‘i e itiiti lava le tigā o le oti, ‘ae tele lava ‘ona o le fafine ‘ua fai lona loto ma mailei ma ‘upega ma ona lima ma noanoaga; o lē ‘ua lelei i luma o le Atua, e sao o ia ‘iā te ia; a o le ‘ua agasala e maua o ia e ia.