4. ‘Ona fetalai mai ai lea o le ALI‘I ‘iā Kitiona, “E to‘atele pea le nu‘u; ‘ia e ‘aveina ifo i latou i le vai, ‘ona ‘ou tofotofoina ai lea o i latou mo oe i lea mea; o le ‘ou te fai atu ai ‘iā te oe, ‘Lua te ō ma lenei,’ ‘ona ‘oulua ō ai lea ma ia; o le ‘ou te fai atu ai fo‘i ‘iā te oe, ‘Lua te lē ō ma lenei,’ ‘ona lē alu ai lea o ia.”
5. ‘Ua ‘aveina ifo e ia le nu‘u i le vai, ‘ona fetalai mai ai lea o le ALI‘I ‘iā Kitiona, “O i latou uma o ē etoeto i o latou laulaufaiva i le vai, e pei ‘ona etoeto o le ulī, ‘e te tu‘u‘ese atu ‘iā te i latou; e fa‘apea fo‘i i latou uma o ē to‘otuli e inu ai.”
6. ‘Ua faitauina e ‘ua tu‘u o latou lima i o latou gutu, ma etoeto ai le vai, ‘ua tolu selau o ia tagata; a o le nu‘u uma ‘ua totoe, ‘ua latou to‘otuli e inu i le vai.
7. ‘Ona fetalai mai ai lea o le ALI‘I ‘iā Kitiona, “O le tolu selau o tagata e ‘ua etoeto i le vai ‘ou te fa‘aola ai ‘iā te ‘outou, ma tu‘uina atu Mitiana i lou lima; a o le nu‘u uma ‘ua totoe, ‘ia ta‘itasi ma alu i lona nu‘u.”
8. ‘Ona ‘ave ai lea e le nu‘u o mea e ‘ai i o latou lima ma a latou pū; ‘ona ‘a‘auina ai lea e ia o Isaraelu uma totoe, ‘ia ta‘itasi ma alu i lona fale ‘ie, a ‘ua tāofia e ia o ia tagata e tolu selau o le itūtau‘a fo‘i a Mitiana ‘ua i lalo i le vanu.
9. O lea lava po ‘ua fetalai mai ai le ALI‘I ‘iā te ia, “‘Inā tula‘i atu ia, ma e alu ifo i le itūtau‘a; auā ‘ua ‘ou tu‘uina atu i latou i lou lima.
10. ‘Ae ‘āfai ‘e te fefe ‘ona alu ifo, lua te ō ifo i le itūtau‘a, ‘oulua ma Fora lau ‘au‘auna;
11. ‘e te fa‘alogo i mea ‘ua latou fetautalatala‘i ai; e mulimuli ane ‘ona malosi ai lea oe ē alu ifo ai i itūtau‘a.” ‘Ona ō ifo ai lea o ia ma Fora lana ‘au‘auna i ‘au a le itūtau‘a e pito mai.
12. ‘Ua ta‘o‘oto i le vanu Mitiana ma Amaleka, ‘atoa ma tagata uma mai sasa‘e, e pei o sē ‘ina ta‘a tele; e lē mafaitau a latou kamela, e pei o le oneone i le matāfaga ‘ona tele.
13. ‘Ua o‘o atu Kitiona, fa‘auta, o lo‘o ta‘u atu e le tasi tagata o lana miti i le tasi, ‘ua fa‘apea atu, “Fa‘auta, na fai la‘u miti; fa‘auta fo‘i, na ta‘avalevale le tasi pōtoi karite i le itūtau‘a a Mitiana, ‘ua o‘o i le tasi fale ‘ie, ‘ua to‘ia ai, ‘ona pa‘ū ai lea, ‘ua mafuli i lalo, ‘ua ta‘atia lava le fale ‘ie.”
14. ‘Ona tali mai ai lea o le tasi, “E leai se isi mea lenei, ‘ua na o le pelu a Kitiona le atali‘i o Ioasa, o le tagata o Isaraelu lea ‘ua tu‘uina atu e le Atua i lona lima o Mitiana ma le itūtau‘a uma.”
15. ‘Ua fa‘alogo Kitiona i le tala o le miti ma lona fa‘amatalaga, ‘ona ifo ai lea o ia i le Atua. ‘Ua toe fo‘i atu i le itūtau‘a a Isaraelu, ‘ua ia fa‘apea atu ai, “Tutū mai ia, auā ‘ua tu‘uina mai i o ‘outou lima e le ALI‘I o le itūtau‘a a Mitiana.”
16. ‘Ua ia vāea le tolu o selau i ‘au e tolu; ‘ua ia avatu fo‘i pū i lima o i latou uma, ma kate le i‘i‘o, ma sulu i totonu o kate.
17. ‘Ua ia fa‘apea atu ‘iā i latou, “‘Ia ‘outou va‘ava‘ai mai ‘iā te a‘u, ma ‘ia fa‘aa‘oa‘o mai ai lava; fa‘auta fo‘i, a a‘u o‘o i le togālauapi e pito mai, ‘ona ‘outou faia lava lea e pei ‘ona ‘ou faia.
18. A matou ilia pū, o a‘u ma i latou uma o ‘iā te a‘u, o ‘outou fo‘i tou te ilia pū ‘ia so‘o lava le togālauapi uma, ma ‘outou fai ane, ‘O le pelu a le ALI‘I ma Kitiona.’”
19. ‘Ona o‘o atu lea o Kitiona ma tagata e to‘aselau ‘ua ‘iā te ia i le togālauapi e pito mai, i le amataga o le leoleoga i le itū po vaeloto; ‘ua latou fa‘ato‘ā laga mata moe; ‘ona latou ilia lava lea o pū, ma ta‘ei i kate i o latou lima.