5. auā fa‘auta, o le a tō oe, ‘e te fānau fo‘i se tama tane; e lē o‘o se tafi i lona ulu, auā e faia le tama ma naseri i le Atua, e āfua mai ‘ina fānau, o ia fo‘i e āfua mai ‘ona fa‘aola ‘iā Isaraelu a‘i lima o Filisitia.”
6. ‘Ona alu atu lea o le fafine ‘ua ta‘u atu ai i lana tane, o lo‘o fa‘apea, “Na alu ane ‘iā te a‘u le tagata o le Atua, o lona tino mai ‘ua pei o le tino o se agelu a le Atua, e matuā mata‘utia lava; ‘ou te le‘i fesili ‘iā te ia pe maifea o ia; na ia lē ta‘u mai fo‘i ‘iā te a‘u lona igoa.
7. Na ia fai mai ‘iā te a‘u, ‘Fa‘auta, o le a tō oe, ‘e te fānau fo‘i le tama tane; o lenei, ‘aua ‘e te inu uaina po o se ‘ava, ‘aua fo‘i ‘e te ‘ai se mea leaga, auā e faia le tama ma naseri i le Atua, e āfua mai ‘ina fānau, e o‘o i le aso o lona oti.’”
8. ‘Ona fa‘atoga atu lea o Manoa i le ALI‘I, ‘ua fa‘apea, “‘Ou te ‘ai‘oi le ALI‘I e, o le tagata o le Atua na e ‘auina mai, se‘i toe maliu mai o ia ‘iā te i mā‘ua, ma fa‘aali mai se mea ma te faia i le tama o le a fānau mai.”
9. ‘Ua fa‘afofoga mai le Atua i le ‘upu a Manoa, ‘ua toe alu atu le agelu a le Atua i le fafine, a o nofo o ia i le fanua; a o Manoa lana tane sa lē i ai ma ia.
10. ‘Ona fa‘ata‘alise lea o le fafine ‘ona momo‘e, ma ta‘u atu i lana tane, ma na fai atu ‘iā te ia, “Fa‘auta, ‘ua fa‘aali mai ‘iā te a‘u le tagata na alu ane ‘iā te a‘u i le tasi aso.”
11. ‘Ona tula‘i lea o Manoa, ma mulimuli atu i lana avā; ‘ua o‘o atu i le tagata, ‘ona ta‘u atu lea o ia ‘iā te ia, “O oe ‘ea le tagata na ‘oulua tautala ma le fafine?”‘Ua fai mai o ia, “O a‘u lava lea.”
12. ‘Ua fai atu Manoa, “O lenei, ‘ia taunu‘u au fetalaiga; se a se mea e tatau ai i le tama, ma se mea e faia ‘iā te ia?”
13. ‘Ua fai mai le agelu a le ALI‘I ‘iā Manoa, “O mea uma na ‘ou fai atu ai i le fafine ‘ia tausi i ai o ia;
14. o mea uma e tupu i le vine ‘aua na te ‘ai ai; o le uaina ma le ‘ava, ‘aua na te inu ai, o mea leaga uma ‘aua na te ‘aina; o mea uma na ‘ou fai atu ai ‘iā te ia ‘ia tausi i ai o ia.”
15. ‘Ona fai atu lea o Manoa i le agelu a le ALI‘I, “Se‘i ‘ou tāofi ‘iā te oe, ‘ou te sauni ai ma oe se tama‘i oti.”
16. ‘Ua fai mai le agelu a le ALI‘I ‘iā Manoa, “E ui lava ‘ina e tāofi ‘iā te a‘u, ‘ou te lē ‘ai i lau mea e ‘ai; ‘ae ‘āfai ‘e te faia se taulaga mū, ‘ia e fai ai i le ALI‘I;” auā e lē iloa e Manoa, o le agelu a le ALI‘I o ia.
17. ‘Ona fai atu lea o Manoa i le agelu a le ALI‘I, “O ai ‘ea lou suafa, ma te vivi‘i ai ‘iā te oe pe a taunu‘u lau fetalaiga?”
18. ‘Ona fai mai lea o le agelu a le ALI‘I ‘iā te ia, “O le a le mea ‘e te fesili mai ai i lo‘u igoa, auā e silisili ‘ese ia.”
19. ‘Ona ‘ave lea e Manoa o le tama‘i ‘oti ‘atoa ma le taulaga i mea e ‘ai, ‘ua ia faitaulaga ai i luga o le papa i le ALI‘I, ‘ona fai lea e le agelu o le vāvega a o matamata ai Manoa ma lana avā.
20. ‘Ua alu a‘e i le lagi le mumū o le afi a‘i luga o le fatafaitaulaga, ‘ona alu a‘e lea o le agelu a le ALI‘I i le mumū o le afi o le fatafaitaulaga, a o matamata ai Manoa ma lana avā; ‘ona fa‘apa‘u‘ū fao ai lea o i lā‘ua i le ‘ele‘ele.
21. E le‘i toe fa‘aali mai lava le agelu a le ALI‘I ‘iā Manoa ma lana avā; ‘ona iloa lava lea e Manoa, o ia o le agelu a le ALI‘I.
22. ‘Ua fai atu Manoa i lana avā, “E oti lava i tā‘ua, auā ‘ua tā va‘aia le Atua.”