14. o mea uma e tupu i le vine ‘aua na te ‘ai ai; o le uaina ma le ‘ava, ‘aua na te inu ai, o mea leaga uma ‘aua na te ‘aina; o mea uma na ‘ou fai atu ai ‘iā te ia ‘ia tausi i ai o ia.”
15. ‘Ona fai atu lea o Manoa i le agelu a le ALI‘I, “Se‘i ‘ou tāofi ‘iā te oe, ‘ou te sauni ai ma oe se tama‘i oti.”
16. ‘Ua fai mai le agelu a le ALI‘I ‘iā Manoa, “E ui lava ‘ina e tāofi ‘iā te a‘u, ‘ou te lē ‘ai i lau mea e ‘ai; ‘ae ‘āfai ‘e te faia se taulaga mū, ‘ia e fai ai i le ALI‘I;” auā e lē iloa e Manoa, o le agelu a le ALI‘I o ia.
17. ‘Ona fai atu lea o Manoa i le agelu a le ALI‘I, “O ai ‘ea lou suafa, ma te vivi‘i ai ‘iā te oe pe a taunu‘u lau fetalaiga?”
18. ‘Ona fai mai lea o le agelu a le ALI‘I ‘iā te ia, “O le a le mea ‘e te fesili mai ai i lo‘u igoa, auā e silisili ‘ese ia.”
19. ‘Ona ‘ave lea e Manoa o le tama‘i ‘oti ‘atoa ma le taulaga i mea e ‘ai, ‘ua ia faitaulaga ai i luga o le papa i le ALI‘I, ‘ona fai lea e le agelu o le vāvega a o matamata ai Manoa ma lana avā.
20. ‘Ua alu a‘e i le lagi le mumū o le afi a‘i luga o le fatafaitaulaga, ‘ona alu a‘e lea o le agelu a le ALI‘I i le mumū o le afi o le fatafaitaulaga, a o matamata ai Manoa ma lana avā; ‘ona fa‘apa‘u‘ū fao ai lea o i lā‘ua i le ‘ele‘ele.
21. E le‘i toe fa‘aali mai lava le agelu a le ALI‘I ‘iā Manoa ma lana avā; ‘ona iloa lava lea e Manoa, o ia o le agelu a le ALI‘I.
22. ‘Ua fai atu Manoa i lana avā, “E oti lava i tā‘ua, auā ‘ua tā va‘aia le Atua.”
23. A ‘ua fai mai lana avā ‘iā te ia, “‘Ana finagalo le ALI‘I e fasioti ‘iā i tā‘ua, po ‘ua na lē talia se taulaga mū, ma se taulaga i mea e ‘ai ai ‘iā te i tā‘ua, po ‘ua na lē fa‘aali mai fo‘i nei mea uma; ‘ua na lē ta‘ua mai fo‘i ‘iā te i tā‘ua ni mea fa‘apea, e pei ‘ona ta‘ua mai nei.”
24. ‘Ona fānau mai lea o le fafine o le tama tane, ‘ua fa‘aigoa ‘iā te ia o Samasoni; ‘ua tupu le tama, ‘ua fa‘amanuia fo‘i o ia e le ALI‘I.
25. ‘Ua amata ‘ona fa‘agae‘etia o ia e le Agaga o le ALI‘I o i Maane-tanu i le vā o Soraa ma Esetaola.#