1. ‘Ua fetalai mai le ALI‘I ‘iā Mose, “‘Inā alu ia ‘iā Farao ma fai atu ‘iā te ia, ‘O lo‘o fa‘apea ‘ona fetalai mai o le ALI‘I; ‘ia e tu‘u mai lo‘u nu‘u e ō, ‘ina ‘ia latou ‘au‘auna mai ‘iā te a‘u.
2. ‘Āfai fo‘i ‘e te lē mafai ‘ona tu‘u mai o i latou e ō, fa‘auta, ‘ou te taia lou nu‘u uma lava i rane.
3. E tutupu tele mai o rane i le vaitafe; e a‘e mai, ma ulufale i lou fale, i lou afeafe moe, ma lou moega, ma le mea ‘e te ta‘oto ai, o fale fo‘i o au ‘au‘auna, ‘atoa ma lou nu‘u, o au ‘ogāumu fo‘i, ma au mea e palu ai falaoa;
4. e ō a‘e rane i luga ‘iā te oe, ma luga o lou nu‘u, ma luga o au ‘au‘auna uma lava.’”
5. ‘Ua fetalai mai fo‘i le ALI‘I ‘iā Mose, “‘E te fai atu ‘iā Arona; ‘‘inā fa‘aloaloa ia lou lima e i ai lou to‘oto‘o i luga o vaitafe, ma vaitai, ma vailepa, ma ia fa‘aa‘e mai rane i le nu‘u o Aikupito.’”
6. ‘Ona fa‘aloaloa lea e Arona o lona lima i vai o Aikupito, ‘ona a‘e mai ai lea o rane, ‘ua lilo ai lava le nu‘u o Aikupito.
7. ‘Ua fa‘apea ‘ona fai fo‘i e taulāitu ‘iā latou togafiti fa‘ataulāitu; ‘ua fa‘aa‘e fo‘i e i latou o rane i le nu‘u o Aikupito.
8. ‘Ona vala‘au lea o Farao ‘iā Mose ma Arona, ‘ua fai mai, “‘Inā fa‘atoga ia ‘oulua i le ALI‘I ‘ia ‘ave ‘ese e ia o rane ‘iā te a‘u ma lo‘u nu‘u, ‘ona ‘ou tu‘u atu lea o le nu‘u e ō, ‘ina ‘ia latou fai taulaga i le ALI‘I.”
9. ‘Ua tali atu Mose ‘iā Farao, “‘Ia e fa‘atonu mai ‘iā te a‘u, po o afea ‘ou te fa‘atoga atu ai mo oe, ma au ‘au‘auna, ma lou nu‘u, ‘ia fa‘aumatia ai rane o ‘iā te oe ma ou fale, ‘ina ‘ia gata i le vaitafe ‘ona i ai?”
10. ‘Ua fai mai o ia, “O a taeao;”‘Ona fai atu lea o Mose, “E faia fa‘apei o lau afioga, ‘ina ‘ia e silafia, e leai se tasi e tusa ma le ALI‘I lo matou Atua;
11. e mavae atu rane o ‘iā te oe, ma ou fale, ma au ‘au‘auna ma lou nu‘u, na o le vaitafe e gata ai.”
12. ‘Ona ō i fafo lea o Mose ma Arona nai ‘iā Farao; ‘ua ‘alaga atu fo‘i Mose i le ALI‘I ‘ona o rane ‘ua ia tu‘uina atu ai ‘iā Farao.