1. ‘Ua toe fetalai mai le ALI‘I ‘iā Mose, “‘Inā alu ia ma ‘ia ‘outou ō a‘e ai lenei mea, o oe ma le nu‘u na e ‘aveina a‘e nai Aikupito, i le nu‘u na ‘ou tautō atu ai ‘iā Aperaamo, ma Isaako, ma Iakopo, ‘ua fa‘apea atu, ‘‘Ou te tu‘uina atu ai i lau fānau.’
2. ‘Ou te ‘auina atu fo‘i i ou luma le agelu; ‘ou te tuli ‘ese atu fo‘i o sa Kanana, ma sa Amorī, ma sa Heti, ma sa Perisē, ma sa Hivī, ma sa Iepusē.
3. O le nu‘u lea o lo‘o tafe ai le suāsusu ma le meli; auā tatou te lē ō a‘e ma ‘outou, auā o le nu‘u ‘outou ‘ua ma‘a‘a le ua; ne‘i ‘ou fa‘aumatia ‘outou i le ala.”
4. ‘Ua fa‘alogo le nu‘u i lenei tala leaga, ‘ona latou fa‘anoanoa ai lea, e lē teuteu fo‘i se tasi i ana teuga;
5. auā na fetalai mai le ALI‘I ‘iā Mose, “Fai atu ia i le fānauga a Isaraelu, ‘O le nu‘u ‘ua ma‘a‘a le ‘ua ‘outou, o le ‘emo o le mata ‘ou te alu a‘e ai i totonu o ‘outou, ma ‘ou fa‘aumatia ‘outou; ma tu‘u ‘ese ia o a ‘outou teuga ‘iā te ‘outou, se‘ia ‘ou iloa, pe se a se mea ‘ou te faia ‘iā te ‘outou.’”
6. ‘Ona tō ‘ese lava lea e le fānauga a Isaraelu o a latou teuga i le mauga o Horepa.
7. A o Mose, ‘ua ‘ave e ia le fale ‘ie, ‘ua fa‘atū ai e ia i tala atu o le togālauapi, e vāvā mamao ma le togālauapi; ‘ua ia fa‘aigoa ai fo‘i, le fale ‘ie o le fa‘apotopotoga; ‘ona ō ai lea o i latou uma ē na sā‘ili i le ALI‘I i le fale ‘ie o le fa‘apotopotoga i tala atu o le togālauapi.
8. A o‘o ‘ina alu atu Mose i le fale ‘ie, ‘ona tutū lea i luga o le nu‘u ‘atoa uma, ‘ua ta‘itasi ma tu mai i le faitoto‘a o lona fale ‘ie, ‘ua latou tulimata‘i ‘iā Mose, ‘ina se‘ia ulu atu ia i le fale ‘ie.
9. ‘Ua ulu atu Mose i le fale ‘ie, ‘ona ifoifo ai lea o le ao fa‘aniutū, ‘ua tu fo‘i i le faitoto‘a o le fale ‘ie; ‘ona fetalai mai lea o le ALI‘I ‘iā Mose.
10. ‘Ua iloa e le nu‘u ‘atoa uma o le ao fa‘aniutū, o lo‘o tu i le faitoto‘a o le fale ‘ie, ‘ona tula‘i lea o le nu‘u uma, ma ifo atu ai, e ta‘ito‘atasi i le faitoto‘a o lona fale ‘ie.