5. ‘Ua ō ane fo‘i Ietero, le tamā o le avā a Mose, ma ona atali‘i, ma lana avā ‘iā Mose i le vao, i le mea ‘ua ia tō ai le lauapi i le mauga o le Atua.
6. ‘Ua ia fai atu fo‘i ‘iā Mose, “O a‘u o Ietero le tamā o lau avā, ‘ua matou ō mai ‘iā te oe, o a‘u, ‘atoa ma la‘u avā, ma ana tama tane e to‘alua ma ia.”
7. ‘Ona alu atu lea o Mose e fa‘afetaia‘i i le tamā o lana avā, ‘ua ifo i ai, ‘ua la feasogi fo‘i ma ia; ‘ua la fealofani, ‘ona ō ane lea i le fale ‘ie.
8. ‘Ona talatala atu lea e Mose i le tamā o lana avā o mea uma lava na faia e le ALI‘I ‘iā Farao ma Aikupito, ‘ona o Isaraelu, ma lo latou tigā uma lava i le ala, o le ALI‘I fo‘i ‘ua lavea‘i ‘iā i latou.
9. ‘Ona ‘oli‘oli lea o Ietero i mea lelei uma lava ‘ua faia e le ALI‘I ‘iā Isaraelu, ‘ina ‘ua lavea‘i mai ‘iā i latou nai lima o Aikupito.
10. ‘Ua fa‘apea ane fo‘i Ietero, “Fa‘afetai lava i le ALI‘I, o lē ‘ua lavea‘i mai ‘iā te ‘outou nai lima o Aikupito ma le lima o Farao, o lē ‘ua lavea‘iina le nu‘u nai lima o Aikupito.
11. O lenei, ‘ua ‘ou iloa e silisili lava le ALI‘I i atua uma lava; auā o le mea na latou fa‘amaualuga ai, na ia manumālō ai ‘iā i latou.”
12. ‘Ua faia fo‘i e Ietero, le tamā o le avā a Mose, le taulaga mū ma taulaga i le Atua; ‘ona ō ane ai lea o Arona ma toeaina uma lava o Isaraelu, latou te ‘a‘ai fa‘atasi ma le tamā o le avā a Mose i luma o le Atua.
13. ‘Ua o‘o fo‘i i le taeao ‘ona nofo lea o Mose e fa‘amasino i le nu‘u; ‘ua laulaututū fo‘i le nu‘u i luma o Mose, e āfua mai i le taeao ‘ua o‘o i le afiafi.
14. ‘Ua iloa fo‘i e le tamā o le avā a Mose, mea uma na ia faia i le nu‘u, ‘ona fai mai ai lea o ia, “Se a lava lenei mea o lo‘o e faia i le nu‘u o le a le mea ‘ua e nofo to‘atasi ai, ‘ae laulaututū mai o le nu‘u uma i ou luma, e āfua mai i le taeao, ‘ua o‘o lava i le afiafi?”
15. ‘Ua tali atu fo‘i Mose i le tamā o lana avā, “Auā o le nu‘u e ō mai i latou ‘iā te a‘u, latou te sā‘ili i le Atua.
16. ‘Ai se mea ‘iā te i latou, latou te ō mai ‘iā te a‘u; ‘ou te fa‘amasino i le tasi ma le tasi, ma ‘ou fa‘ailoa atu i ai o fa‘atonuga a le Atua ma ana tulafono.”
17. ‘Ona fai mai lea o le tamā o le avā a Mose ‘iā te ia, “E lē lelei le mea o lo‘o e faia.
18. O le a matuā tigāina oe ‘atoa ma lenei nu‘u o lo‘o ‘iā te oe; auā e mafatia oe i lenei mea, ‘e te lē lavā ‘ona e faia to‘atasi.
19. O lenei, ‘ia e fa‘alogo mai ‘iā te a‘u, ‘ou te fa‘atonu atu ‘iā te oe, ‘ona ‘iā te oe lea o le Atua; ‘ia fai oe ma tautu‘u ‘upu mo le nu‘u i luma o le Atua, ‘ina ‘ia e taulogologoina mea i le Atua.
20. ‘Ia e fa‘amalamalama atu fo‘i ‘iā te i latou i fa‘atonuga ma tulafono, ma fa‘ailoa atu ‘iā i latou le ala latou te sāvavali ai, ma mea e fai, latou te faia.
21. ‘ia e filifili fo‘i ai le nu‘u ‘atoa ni tagata o loto tetele, o ē matata‘u i le Atua, o tagata fa‘amaoni, ma le ‘ino‘ino i le manumanu. Ma ‘ia e tofia i latou e pule ‘iā i latou, e fai ma ali‘i o ta‘ito‘aafe, ma ali‘i o ta‘ito‘aselau, ma ali‘i ta‘ito‘alimagafulu, ma ali‘i o ta‘ito‘atinoagafulu;
22. ma ‘ia latou fa‘amasino atu i le nu‘u i aso uma lava; o mea tetele uma lava e ‘aumai ia ‘iā te oe, a o mea iti uma ‘iā latou fa‘amasinoina; ‘ona fa‘amāmā ai lea ‘iā te oe, latou te fesoasoani fo‘i ‘iā te oe.
23. ‘Āfai ‘e te faia lenā mea, a fetalai mai fo‘i le Atua ‘iā te oe fa‘apenā, ‘ona e lavā tumau lea; o lenei nu‘u uma fo‘i, latou te maua atu le mea latou te nonofo ai ma le manuia.”