1. ‘Ua fa‘alogo Ietero, o le ositaulaga a Mitiana, o le tamā fo‘i o le avā a Mose, i mea uma na faia e le Atua ‘iā Mose ma Isaraelu lona nu‘u, ‘ina ‘ua ‘aumaia e le ALI‘I o Isaraelu nai Aikupito;
2. ‘ona ‘ave lea e Ietero le tamā o le avā a Mose, o Sepora le avā a Mose, auā na ia mua‘i fa‘afo‘i atu ‘iā te ia,
3. ma ana tama tane e to‘alua, o le igoa o le tasi o Keresoma, auā ‘ua fa‘apea ane, “‘Ua ‘ou āumau i le nu‘u ‘ese.”
4. O le igoa fo‘i o le tasi o Elisara, auā, (sa fa‘apea a ia,) “O le Atua o lo‘u tamā, o lo‘u fesoasoani lea, na ia lavea‘i mai ‘iā te a‘u a‘i le pelu a Farao.”
5. ‘Ua ō ane fo‘i Ietero, le tamā o le avā a Mose, ma ona atali‘i, ma lana avā ‘iā Mose i le vao, i le mea ‘ua ia tō ai le lauapi i le mauga o le Atua.
6. ‘Ua ia fai atu fo‘i ‘iā Mose, “O a‘u o Ietero le tamā o lau avā, ‘ua matou ō mai ‘iā te oe, o a‘u, ‘atoa ma la‘u avā, ma ana tama tane e to‘alua ma ia.”
7. ‘Ona alu atu lea o Mose e fa‘afetaia‘i i le tamā o lana avā, ‘ua ifo i ai, ‘ua la feasogi fo‘i ma ia; ‘ua la fealofani, ‘ona ō ane lea i le fale ‘ie.
8. ‘Ona talatala atu lea e Mose i le tamā o lana avā o mea uma lava na faia e le ALI‘I ‘iā Farao ma Aikupito, ‘ona o Isaraelu, ma lo latou tigā uma lava i le ala, o le ALI‘I fo‘i ‘ua lavea‘i ‘iā i latou.
9. ‘Ona ‘oli‘oli lea o Ietero i mea lelei uma lava ‘ua faia e le ALI‘I ‘iā Isaraelu, ‘ina ‘ua lavea‘i mai ‘iā i latou nai lima o Aikupito.
10. ‘Ua fa‘apea ane fo‘i Ietero, “Fa‘afetai lava i le ALI‘I, o lē ‘ua lavea‘i mai ‘iā te ‘outou nai lima o Aikupito ma le lima o Farao, o lē ‘ua lavea‘iina le nu‘u nai lima o Aikupito.
11. O lenei, ‘ua ‘ou iloa e silisili lava le ALI‘I i atua uma lava; auā o le mea na latou fa‘amaualuga ai, na ia manumālō ai ‘iā i latou.”
12. ‘Ua faia fo‘i e Ietero, le tamā o le avā a Mose, le taulaga mū ma taulaga i le Atua; ‘ona ō ane ai lea o Arona ma toeaina uma lava o Isaraelu, latou te ‘a‘ai fa‘atasi ma le tamā o le avā a Mose i luma o le Atua.
13. ‘Ua o‘o fo‘i i le taeao ‘ona nofo lea o Mose e fa‘amasino i le nu‘u; ‘ua laulaututū fo‘i le nu‘u i luma o Mose, e āfua mai i le taeao ‘ua o‘o i le afiafi.