15. ‘Ua potopoto fo‘i sa Iutā ē na i Susana i le aso e sefulu ma le fa o le masina o Atara, ‘ona latou fasiotia lea i Susana o tagata e tolu selau; ‘ae le‘i vetea e i latou le ‘oloa.
16. O sa Iutā uma fo‘i ē na i ai i itū mālō o le tupu, na potopoto i latou e tete‘e atu ia ola ai i latou, ‘ona mapu ai lea o i latou i ē na ita ‘iā te i latou; na latou fasiotia fo‘i ē na ‘ino‘ino ‘iā te i latou o fitu sefulu o afe ma afe e lima; ‘ae le‘i vetea e i latou le ‘oloa,
17. o le aso e sefulu ma le tolu o le masina o Atara na fasia ai; ‘ona mapu ai lea o i latou i lona aso e sefulu ma le fa ma fai ai lenā ma aso e fai ai le tausamiga ma ‘oli‘oli ai.
18. O lona aso e sefulu ma le tolu, ma lona aso e sefulu ma le fa na potopoto ai sa Iutā ē na i Susana; ‘ona mapu ai lea o i latou i lona aso e sefulu ma le lima ma ‘ua fai lenā ma aso e fai ai le tausamiga, ma ‘oli‘oli ai.
19. O le mea lea na fai ai e sa Iutā sa i faoa ‘a‘ai, o ē na nonofo i ‘a‘ai e lē nofo ‘olo, o le aso e sefulu ma le fa o le masina o Atara ma aso lelei e ‘oli‘oli ai ma fai ai le tausamiga ma fe‘avea‘i ai tufa‘aga.
20. Na tusia fo‘i e Moretekai o ia mea, na ia avatua fo‘i tusi i sa Iutā uma ē na i ai i itū mālō uma o le tupu o Asueru, o ē na latalata mai ‘atoa ma ē mamao atu,
21. e fa‘amau ai ‘iā te i latou, ‘ona ia faia le aso e sefulu ma le fa o le masina o Atara, ma lona aso e sefulu ma le lima i tausaga uma,
22. auā o aso ia na mapu ai sa Iutā i ē na ita ‘iā te i latou, o le masina fo‘i na liliuina ai mo i latou o le fa‘anoanoa i le ‘oli‘oli ma le fa‘avauvau i le aso lelei. ‘Ona ia faia ia aso ma aso e fai ai le tausamiga ma ‘oli‘oli ai ma fe‘avea‘i ai tufa‘aga ma mea alofa i ē matitiva.