4. E fa‘atafunaina a ‘outou fatafaitaulaga, e lepetia fo‘i a ‘outou tupua o le la ma ‘ou lafoina o ‘outou tagata fasia i luma o a ‘outou tupua.
5. ‘Ou te tu‘uina atu fo‘i tino ‘ua oti o le fānauga a Isaraelu i luma o a latou tupua ma ‘ou fa‘ata‘ape‘apeina o ‘outou ivi ‘ia so‘o ai a ‘outou fatafaitaulaga.
6. E fa‘atafunaina ‘a‘ai i mea uma tou te nonofo ai, e fa‘aumatia fo‘i mea maualuluga, ‘ina ‘ia fa‘atafunaina ma fa‘aumatia a ‘outou fatafaitaulaga ma ‘ia lepetia, ma fa‘ai‘uina a ‘outou tupua, ‘ia vavaeina i lalo a ‘outou tupua o le la, ma ia tineia a ‘outou galuega.
7. E pa‘u‘ū fo‘i e ‘ua fasia i totonu ‘iā te ‘outou, tou te iloa ai o a‘u o le ALI‘I.
8. ‘Ae peita‘i ‘ou te fa‘atotoeina ni o ‘outou ‘ia sao i le pelu i nu‘u ‘ese, pe a fa‘ata‘ape‘apeina ‘outou i nu‘u.
9. E manatu mai fo‘i ‘iā te a‘u ni o ‘outou e sao i nu‘u e tāfea i ai i latou, pe a ‘ou fa‘amomomoina latou loto mulilulua na ō ‘ese ai ‘iā te a‘u ma o latou mata mulilulua na mulimuli atu ai ‘iā latou tupua; e ‘ino‘ino fo‘i i latou ‘iā te i latou ‘ona o mea leaga ‘ua latou faia ‘iā latou mea ‘inosia uma.
10. ‘Ona iloa ai lea e i latou o a‘u o le ALI‘I, na ‘ou le fai atu fua, ‘ou te faia lenei mea leaga ‘iā te i latou.
11. ‘Ua fa‘apea ‘ona fetalai mai o le Ali‘i le ATUA: ‘Inā pati ia ou lima ma tatū ou vae ma fai atu, Auē i mea uma e ‘inosia ma le leaga a le ‘āiga o Isaraelu! e oti i latou i le pelu ma le oge ma le fa‘ama‘i.
12. O lē ‘ua mamao e oti ia i le fa‘ama‘i, o lē ‘ua latalata mai e fasia ia i le pelu, o lē ‘ua toe ma ‘ua sao e oti ia i le oge; ‘ou te fa‘auma atu lo‘u tigā ‘iā te i latou.
13. ‘Ona iloa ai lea e ‘outou o a‘u o le ALI‘I, ‘ina ‘ua i ai o latou tagata fasia i le vā o a latou tupua e so‘o ai a latou fatafaitaulaga, i luga o mauga maualuluga uma, i tumutumu uma o mauga ma lalo o la‘au tauluuluola uma ma lalo o la‘au felefele uma, o mea na latou avatu ai mea manogi lelei ‘iā latou tupua uma.
14. ‘Ou te fa‘aloaloa atu fo‘i lo‘u lima i luga ‘iā te i latou ma ‘ou faia le nu‘u ma mea gaogao, e sili i le gaogao o le vao o i Tipelata, i mea uma latou te nonofo ai; ‘ona latou iloa ai lea o a‘u o le ALI‘I.#