9. ‘Ou te faia fo‘i ‘iā te oe se mea ‘ou te le‘i faia, ‘ou te lē toe faia fo‘i se mea fa‘apea, ‘ona o au mea uma e ‘inosia.
10. O le mea lea e ‘aina ai e tamā o latou atali‘i i totonu ‘iā te oe, e ‘aina fo‘i e atali‘i o latou tamā; ‘ou te fa‘ao‘oina fo‘i sala ‘iā te oe, ‘ou te fa‘ata‘ape‘apeina fo‘i i matāmatagi uma e o totoe uma o ‘iā te oe.
11. O le mea lea o lo‘o fetalai mai ai le Ali‘i le ATUA, O lo‘o ola a‘u, e moni, ‘ona ‘ua leaga ‘iā te oe lo‘u malumalu i au mea leaga uma ma au mea e ‘inosia uma, o a‘u fo‘i ‘ou te fa‘ato‘aitiitiina oe, ‘ou te lē fa‘asao, ‘ou te lē fa‘apelepeleina lava.
12. E oti lona tolu o vaega o ‘iā te oe i le fa‘ama‘i, e fa‘aumatia fo‘i i le oge i latou i totonu ‘iā te oe; e fasia fo‘i le tasi vaega i le pelu i mea uma e si‘osi‘oina ai oe; ‘ou te fa‘ata‘ape‘apeina le isi ona tolu o vaega i matāmatagi uma, ‘ou te tō a‘e fo‘i le pelu e mulimuli atu ‘iā te i latou.
13. ‘Ou te fa‘auma atu lo‘u ita, e tumau fo‘i lo‘u tigā tele ‘iā te i latou, ‘ona to‘a filemū ai lea o a‘u; ‘ona iloa ai lea o i latou, o a‘u o le ALI‘I na ‘ou fai atu i lo‘u fuā ‘ina ‘ua ‘ou fa‘auma atu lo‘u ita tele ‘iā te i latou.
14. ‘Ou te faia fo‘i oe ma mea ‘ua fa‘atafunaina ma luma i nu‘u ‘ese e vagavagaia oe, i luma o i latou uma o ē ui ane ai.
15. E fai fo‘i oe ma luma ma ‘upu fāifai ma fa‘aa‘oa‘o ma mea e ofo ai i nu‘u ‘ese e vagavagaia oe, ‘ina ‘ua ‘ou fa‘ao‘oina sala ‘iā te oe i lo‘u ita ma lo‘u tigā, ma a‘oa‘iga o matuā ogo lava. O a‘u o le ALI‘I o lē fai atu ai.
16. Pe a ‘ou fana atu ‘iā te i latou i a‘u ū fanafana, o le oge e malaia ai i latou, e fano ai i latou, ‘ou te fa‘ao‘oina atu ai fo‘i e fano ai ‘outou; ‘ou te fa‘ateleina le oge ‘iā te ‘outou ma ‘ou gausia le to‘oto‘o o la ‘outou mea e ‘ai.
17. ‘Ou te fa‘ao‘o atu fo‘i ‘iā te ‘outou le oge ma manu fe‘ai, e āufānaua ai oe, e ui atu ‘iā te oe le fa‘ama‘i ma le toto; ‘ou te fa‘ao‘o atu fo‘i le pelu ‘iā te oe. O a‘u o le ALI‘I o lē fai atu ai.#